Rusiyalı alimlər hepatit B-nin müalicəsi üçün preparat hazırlayırlar
Rusiya tədqiqatçıları hepatit B infeksiyasının müalicəsi üçün yeni dərman vasitəsi hazırlayırlar.
TodayPress TV xəbər verir ki, bu barədə Seçenov Universitetinin rektoru Pyotr Qlıboçko açıqlama verib.
Rektor bildirib ki, hazırda mövcud olan preparatlar virusu yalnız yatırtmağa imkan verir, lakin onu orqanizmin hüceyrələrindən tamamilə çıxara bilmir. "Mütəxəssislərimiz xüsusi daşıyıcı sistemlər üzərində tədqiqatlar aparır və mövcud texnologiyaları təkmilləşdirirlər. Əsas məqsədimiz gələcəkdə virusun genomunu infeksiyaya yoluxmuş hüceyrələrdən tam şəkildə yox etməyə nail olmaqdır", - deyə P.Qlıboçko qeyd edib.
Bundan əlavə, universitetdə biotibbi hüceyrə məhsullarının istehsalına başlanılıb. Hazırda bu məhsulların köməyi ilə qulaq pərdəsinin rekonstruksiyası və səs telləri patologiyalarının müalicəsi üzrə əməliyyatlar həyata keçirilir. Gələcəkdə bu texnologiyaların qığırdaq toxumasının və digər orqanların bərpası üçün tətbiq olunması planlaşdırılır.
