Qoxu hissinin zəifləməsi ürək xəstəliyinin xəbərçisi ola bilər

Yaşlı insanlarda qoxu hissinin azalması iskemik ürək xəstəliyi (İÜX) riskinin artması ilə əlaqələndirilə bilər. Bu barədə Miçiqan Dövlət Universitetinin alimlərinin apardığı tədqiqatda qeyd olunur.

TodayPress TV xəbər verir ki, araşdırmanın nəticələri “JAMA Otolaryngology–Head & Neck Surgery” jurnalında dərc olunub.

Mütəxəssislər “Ateroskleroz və İcma Riskləri üzrə Uzunmüddətli Tədqiqat”da iştirak edən 5 min nəfərdən çox insanın məlumatlarını təhlil ediblər. Tədqiqatın əvvəlində iştirakçılarda ürək-damar xəstəliyi əlamətləri müşahidə olunmayıb. Onların qoxu funksiyası 12 qoxudan ibarət test vasitəsilə qiymətləndirilib və nəticələr “yaxşı”, “orta” və “zəif” qruplarına bölünüb.

Onillik müşahidə dövründə 280 nəfərdə (5,4 faiz) iskemik ürək xəstəliyi aşkarlanıb. Analizlər göstərib ki, qoxu hissi zəif olanlarda İÜX riski qoxusu normal olanlara nisbətən iki dəfə yüksəkdir. Ən güclü əlaqə tədqiqatın ilk illərində (2-ci ildə 2,06, 4-cü ildə 2,02 nisbətində) müşahidə olunub, lakin 9-cu ilə yaxın bu əlaqə zəifləyib. Yaş, xolesterin səviyyəsi, siqaret çəkmə və şəkərli diabet kimi tibbi amillər nəzərə alındıqdan sonra da əlaqə statistik olaraq əhəmiyyətli qalıb. Qoxu hissi orta səviyyədə zəif olan şəxslərdə də müəyyən risk artımı müşahidə edilib.

Mütəxəssislərin fikrincə, bu əlaqənin mexanizmləri hələ tam aydın deyil. Ola bilsin ki, qoxu itkisi orqanizmin ümumi qocalma prosesinin və ya ürək-damar sistemində erkən dəyişikliklərin göstəricisidir.

Qiymət Mahir