Məşhəd ələ keçirildi və bir neçə saata minlərlə insan qətlə yetirildi - Yanvarda nələr baş verib? -VİDEO

İran ölkənin əhalisinin sayına görə ikinci ən böyük şəhəri olan Məşhəd üzərində nəzarəti itirməyə nə qədər yaxın olduğunu rəsmən etiraf edib.

TodayPress TV xəbər verir ki, İran Dövlət Televiziyasının ("Seda va Sima") efirində yayımlanan xüsusi proqramda xarici işlər naziri Abbas Əraqçi və rejimə bağlılığı ilə tanınan rejissor Cavad Moqueyi bu bəyanatlarla çıxış ediblər. 

Hər iki şəxs, yanvarın 18-də Məşhəd şəhərinin rejim əleyhinə yönəlmiş kütləvi nümayişlərin miqyası qarşısında faktiki olaraq bir neçə saatlıq süqut etdiyini boyunlarına alıblar.

Verilişin aparıcısı da studiyada səslənən fikirləri təsdiqləyərək, təhlükəsizlik qüvvələrinin kütlənin qarşısını ala bilməməsi səbəbindən strateji əhəmiyyətli şəhərin bir neçə saat ərzində tamamilə "çökdüyünü" ifadə edib.

İran rəsmilərinin öz dilindən səslənən etiraflar rejim əleyhinə dalğanın nə qədər kütləvi olduğunu və Tehranın bu cür genişmiqyaslı müqavimətlə üzləşməyə tamamilə hazırlıqsız yaxalandığını nümayiş etdirir.

Qeyd edək ki, hadisələr 2025-ci il dekabrın sonu və 2026-cı il yanvarında İranda başlayan kütləvi etirazlar zamanı baş verib. Etirazlar ölkədə dərin iqtisadi böhran, rialın kəskin dəyər itirməsi və hakimiyyətə qarşı narazılıq fonunda başlayıb. Ən qanlı qarşıdurmalar isə 8–10 yanvar 2026-cı il tarixlərində Məşhəd də daxil olmaqla bir sıra şəhərlərdə qeydə alınıb. Beynəlxalq insan haqları təşkilatları təhlükəsizlik qüvvələrinin etirazçılara qarşı ölümcül gücdən istifadə etdiyini sənədləşdiriblər.

Məşhəddə nəzarəti itirmək qorxusu ilə üzləşən rejimin nümayişləri yatırmaq üçün tətbiq edilən qəddar basqılar zamanı 45 mindən çox insanı qətlə yetirdiyi bildirilir. 

Jalə Rövşən