Lavrovdan Ermənistan açıqlaması: "Seçim etməlidir"
"Ermənistan Avrasiya İqtisadi İttifaqı ilə Avropa İttifaqı arasında seçim etməlidir".
TodayPress TV xəbər verir ki, bunu Rusiyanın xarici işlər naziri Sergey Lavrov "İzvestiya" qəzetinə müsahibəsində deyib.
Onun sözlərinə görə, Ermənistan artıq Avropa İttifaqına inteqrasiya istiqamətində addımlar atmağa başlayıb və bu məsələ ilə bağlı yekun qərar verməlidir.
Nazir əlavə edib ki, əgər İrəvan Aİ-yə üzvlük prosesinin başlanmasını nəzərdə tutan qanun qəbul edibsə, bu, Ermənistan hakimiyyətinin məsələni gündəmə gətirdiyini göstərir. O vurğulayıb ki, ölkə ya Avrasiya İqtisadi İttifaqı çərçivəsində qalmalı, ya da Avropa İttifaqı istiqamətində irəliləməlidir.
Lavrov bildirib ki, Rusiya Ermənistan xalqının verəcəyi istənilən qərara hörmətlə yanaşacaq.
Xatırladaq ki, mart ayında Ermənistan Milli Assambleyası ölkənin Aİ-yə üzvlük prosesinə başlamağı nəzərdə tutan qanun layihəsini qəbul edib. Daha əvvəl Ermənistanın baş naziri Nikol Paşinyan isə mümkün üzvlük məsələsinin xalqın iradəsi əsasında həll olunmalı olduğunu bəyan etmişdi.
Türkan İsgəndərli
