Çin ABŞ mallarına əlavə rüsumu tətbiqini dayandırır
Çin noyabrın 10-dan etibarən ABŞ-dən idxal olunan mallara əlavə 24 faiz gömrük rüsumunun tətbiqini bir il müddətinə dayandıracaq.
TodayPress TV xəbər verir ki, bu barədə məlumat Çin Xalq Respublikasının Maliyyə Nazirliyinin rəsmi saytında dərc olunub.
Bununla yanaşı, Amerika mallarına tətbiq edilən əlavə 10 faizlik rüsumun qüvvədə qalacağı qeyd olunur.
Rəsmi açıqlamada vurğulanır ki, bu addım Çin və ABŞ arasında ticarət-iqtisadi əlaqələrin sağlam, sabit və davamlı inkişafına töhfə verəcək və hər iki ölkə xalqına fayda gətirəcək.
Xatırladaq ki, oktyabrın 30-da Çin lideri Si Cinpin və ABŞ prezidenti Donald Tramp Cənubi Koreyada danışıqlar aparıblar.
Türkan İsgəndərli
