Avropada güclü qar: 6 nəfər öldü, yüzlərlə uçuş ləğv edildi
Avropada güclü qar və buzlanma genişmiqyaslı nəqliyyat problemlərinə səbəb olub.
TodayPress TV xəbər verir ki, bu barədə "BBC News" məlumat yayıb.
Məlumata görə, əlverişsiz hava şəraiti nəticəsində baş verən hadisələrdə altı nəfər həyatını itirib.
Fransanın iki müxtəlif bölgəsində yol şəraitinin pisləşməsi səbəbindən beş nəfər ölüb. Bosniya və Herseqovinanın paytaxtı Sarayevoda isə qarın qalınlığının 40 sm-ə çatdığı ərazidə bir qadın həlak olub.
Avropada yüzlərlə uçuş ləğv edilib, minlərlə sərnişin Paris və Amsterdam hava limanlarında qalıb. Fasilələrin davam edəcəyi bildirilir.
Fransanın cənub-qərbindəki Landes departamentində buzlanma səbəbindən baş verən iki yol qəzasında üç nəfər ölüb. Paris bölgəsindəki başqa bir qəza isə iki nəfərin həyatına son qoyub.
Balkanlarda da güclü qar və yağış müşahidə olunub. Bosniya polisinin məlumatına görə, Sarayevoda bir qadın üzərinə ağac aşması nəticəsində ölüb.
Yüzlərlə sərnişin hava limanlarında qalaraq uçuşların bərpası ilə bağlı məlumat gözləyir, aviaşirkətlərin xidmət məntəqələrində uzun növbələr yaranıb.
Türkan İsgəndərli
