ABŞ - İran sülhünün "qiyməti" açıqlandı - 24 milyard dollar...
Tehran və Vaşinqton arasında mümkün sülh sazişinin bir hissəsi kimi məlumat mübadiləsi memorandumu çərçivəsində təxminən 24 milyard dollar dəyərində İran aktivləri dondurulmadan azad oluna bilər.
TodayPress TV xəbər verir ki, bu barədə "Tasnim" agentliyi məlumat yayıb.
Bildirilib ki, İran tərəfi memorandumu imzaladıqdan dərhal sonra bu məbləğin yarısını (təxminən 12 milyard dollar) əldə etmək istəyir. Qalan hissə isə növbəti 60 gün ərzində əlçatan olacaq.
Bu memorandum Tehranla Vaşinqton arasında sülh sazişinin mühüm komponenti kimi qiymətləndirilir. Hazırda tərəflər arasında danışıqlar davam edir və bir sıra məsələlər, o cümlədən Hörmüz boğazının açılması, sanksiyaların yüngülləşdirilməsi və digər aspektlər müzakirə olunur.
Qeyd edək ki, İranın ümumi dondurulmuş aktivlərinin həcmi 100 milyard dollardan çox qiymətləndirilir. Bu razılaşma potensial olaraq Tehran üçün mühüm maliyyə resursları açacaq.
Onu da qeyd edək ki, bu gün gecə saatlarından (26 may) İran və ABŞ-İsrail qüvvələri arasında toqquşmalar yenidən canlanıb.
Jalə Rövşən
