Zidanın ilk oyunu rekord maraqla qarşılandı
Fransa millisinin Zidanın rəhbərliyi altında keçiriləcək ilk oyununun bütün biletləri bir günə satılıb.
TodayPress TV xəbər verir ki, bu barədə “RMC Sport” məlumat yayıb.
Mənbənin iddiasına görə, Zinəddin Zidanın Fransa millisinin baş məşqçisi təyin olunması azarkeşlər arasında böyük maraq yaradıb. Mütəxəssisin rəhbərliyi altında keçiriləcək ilk ev oyununun bütün biletləri 24 saatdan az müddətdə tükənib.
Bildirilib ki, biletlərin satışı iyulun 31-də başlayıb. Lakin ertəsi gün artıq heç bir bilet əldə etmək mümkün olmayıb.
Zidan Fransa millisində debütünü oktyabrın 2-də UEFA Millətlər Liqası çərçivəsində İtaliyaya qarşı keçiriləcək oyunda edəcək. Qarşılaşma təxminən 80 min tamaşaçı tutumuna malik “Stad de Frans” stadionunda baş tutacaq.
Qeyd edək ki, Fransa Futbol Federasiyası Zinəddin Zidanla 4 illik müqavilə imzaladığını rəsmən açıqlayıb. Fransalı mütəxəssis 2021-ci ildən bəri heç bir komandada çalışmırdı. O, daha əvvəl iki dövrdə “Real Madrid” klubunu çalışdıraraq ümumilikdə 11 titul, o cümlədən üç UEFA Çempionlar Liqası kuboku qazanıb.
Namiq HUN
