Luka Zidan "Qranada" ilə müqaviləsini LƏĞV ETDİ
Fransa millisinin heyətində 1998-ci ildə dünya çempionu olmuş Zinəddin Zidanın oğlu Luka Zidan İspaniyanın "Qranada" klubu ilə müqaviləsini ləğv edib.
TodayPress TV xəbər verir ki, bu barədə klubun mətbuat xidməti məlumat yayıb.
28 yaşlı qapıçı kluba 2024-cü ilin yayında keçib və iki mövsüm ərzində İspaniya çempionatı və Kubokunda ümumilikdə 45 oyun keçirib.
Onun "Qranada" ilə müqaviləsi 2027-ci ilədək nəzərdə tutulmuşdu, lakin tərəflər əməkdaşlığa vaxtından əvvəl xitam vermək qərarına gəliblər.
"Klub Luka Zidana bu iki mövsüm ərzində göstərdiyi sədaqətə görə təşəkkür edir və ona gələcək peşəkar fəaliyyətində uğurlar arzulayır", - deyə "Qranada"nın bəyanatında bildirilib.
Qeyd edək ki, Luka Zidan "Real Madrid"in yetirməsidir. O həmçinin "Rasinq" (Santander), "Rayo Valyekano" və "Eybar" klublarında, eləcə də Fransanın müxtəlif yaş qrupları üzrə yeniyetmə və gənclər yığmalarında çıxış edib. Luka ötən ilin sentyabrında Əlcəzair milli komandasında oynamaq üçün idman vətəndaşlığını dəyişib və 2026-cı il dünya çempionatı üçün yığmaya dəvət alıb.
Lukadan başqa, Zinəddin Zidanın daha üç oğlu peşəkar futbolla məşğul olub. Belə ki, 30 yaşlı yarımmüdafiəçi Entso artıq karyerasını başa vurub, 23 yaşlı yarımmüdafiəçi Teo "Kordoba"da, 19 yaşlı müdafiəçi Elyas isə "Red Star"da çıxış edir.
Öz növbəsində, İspaniyanın "Leqanes" klubu Luka Zidan ilə müqavilə imzaladığını elan edib.
Zidan "Leqanes" ilə "1+1" sxemi üzrə razılaşma əldə edib.
