İngiltərə futbolunda casusluq qalmaqalı böyüyür
Çempionşipin play-off finalı casusluq qalmaqalına görə təxirə salına və ya tamamilə ləğv oluna bilər.
TodayPress TV xəbər verir ki, bu barədə İngiltərə Futbol Liqası (EFL) rəsmi açıqlama yayıb.
Məlumata görə, “Sauthempton” klubunun performans analitiki pley-offun ilk yarımfinal oyunu öncəsində “Midlsbro” komandasının məşqini gizli şəkildə lentə alarkən və taktiki hazırlığı fotoya çəkərkən yaxalanıb.
İki oyunun nəticəsinə əsasən “Sauthempton” rəqibini məğlub edərək finala yüksəlib. Komanda mayın 23-də “Hall Siti” ilə İngiltərə Premyer Liqasına vəsiqə uğrunda qarşılaşmalıdır.
EFL bildirib ki, məsələ ilə bağlı müstəqil intizam komissiyasının iclası ən geci mayın 19-na qədər keçiriləcək. Qurum hazırda finalın planlaşdırıldığı tarixdə baş tutacağı ssenari üzrə hazırlıqları davam etdirir.
Bununla belə, azarkeşlərə xəbərdarlıq olunub ki, intizam araşdırmasının nəticələri matçın tarixində və ya təşkilində dəyişikliklərə səbəb ola bilər.
Qeyd olunub ki, ən sərt qərar kimi “Sauthempton”un ümumiyyətlə pley-offdan kənarlaşdırılması və Premyer Liqaya yüksəlmək şansını itirməsi ehtimalı da var.
Digər mümkün variant isə komissiyanın qərarı vaxtında açıqlamaması səbəbindən finalın başqa tarixə və ya başqa stadiona keçirilməsidir. Bildirilir ki, mayın sonu və iyunun əvvəlində “Wembley Stadium” da tədbir qrafiki olduqca sıxdır.
Namiq HUN
