Fransa millisinin yeganə problemi nədir? Deşam cavab verdi
Didye Deşam dünya çempionatı öncəsində Fransa yığmasının heyəti ilə bağlı fikirlərini bölüşüb.
TodayPress TV xəbər verir ki, təcrübəli mütəxəssis komandanın fərdi keyfiyyətlər baxımından çox güclü olduğunu vurğulasa da, müəyyən bir məqamı çatışmazlıq kimi qiymətləndirib.
Deşamın sözlərinə görə, əsas problem gənc futbolçuların böyük turnirlərdə kifayət qədər təcrübəyə malik olmamasıdır:
“Fərdi istedad baxımından çox güclü futbolçularımız var və seçim imkanlarım kifayət qədər genişdir. 2026-cı ildə göstərə biləcəyim yeganə kiçik çatışmazlıq odur ki, 2018-ci ildə dünya çempionu olan futbolçuların əksəriyyəti artıq 2014 və 2016-cı illərin böyük turnirlərində iştirak təcrübəsinə malik idi. İndi isə heyətdə böyük yarışlarda təcrübəsi məhdud olan çoxlu gənc oyunçu var”.
Fransa millisinin baş məşqçisi milli forma daşımağın məsuliyyətindən də danışıb:
“Bu formanı geyinən hər bir futbolçu böyük məsuliyyət daşıyır. Onlar yaxşı oynamağa və komandaya fayda verməyə borcludurlar. Mən 14 il əvvəl ilk gündən demişəm ki, Fransa millisinə gələndə burada nəsə almaq üçün yox, vermək üçün olmalısınız”.
Qeyd edək ki, Fransa milli komandası 2026-cı il dünya çempionatının əsas favoritlərindən biri hesab olunur.
Namiq HUN
