“Əl-Nəsr” Pioli ilə yollarını ayırdı

Səudiyyə Ərəbistanının “Əl-Nəsr” klubu baş məşqçi Stefano Piolini istefaya göndərdiyini açıqlayıb. 

TodayPress TV xəbər verir ki, 58 yaşlı mütəxəssis karyerasını yenidən İtaliyada davam etdirəcək. 

Ər-Riyad təmsilçisi “Fiorentina”nın sükanı arxasına keçəcək məşqçiyə “Əl-Nəsr”lə əməkdaşlığa görə təşəkkür edib. 

Artıq Piolinin “bənövşəyi” kluba gətirəcəyi futbolçu da məlumdur. Onun ilk transfer hədəfi Bosniya və Herseqovina millisinin təcrübəli hücumçusu Edin Dzekodur.

Qeyd edək ki, Stefano Pioli 2024-cü ilin sentyabrında “Əl-Nəsr”in baş məşqçisi təyin olunmuşdu. Klub onun rəhbərliyi altında Səudiyyə Ərəbistanı çempionatını 3-cü pillədə başa vurub. Təcrübəli çalışdırıcı daha əvvəl “Fiorentina” ilə yanaşı, İtaliyada “Bolonya”, “Latsio”, “İnter” və “Milan” kimi klublarda da fəaliyyət göstərib.

Namiq HUN