"Barselona" maliyyə pozuntuları ilə bağlı bəyanat yaydı
"Barselona" klubu maliyyə qaydalarının pozulması ilə bağlı irəli sürülən ittihamlara dair rəsmi bəyanat yayıb.
TodayPress TV xəbər verir ki, klub rəhbərliyi çirkli pulların yuyulması və əsassız komissiya haqlarının alınması kimi iddiaları qəti şəkildə təkzib edib. Kataloniya təmsilçisi bildirib ki, hələ yanvarın ortalarında bəzi media qurumları və "Mütəşəkkil Cinayətkarlıq və Korrupsiya Hesabatı Layihəsi" (OCCRP) tərəfindən daxil olan sorğular daxili və xarici yoxlamalardan keçirilib. Araşdırmalar nəticəsində məlumatların həqiqəti əks etdirmədiyi və saxtalaşdırılmış sənədlərə əsaslandığı müəyyən olunub.
Klub qeyd edir ki, bu yalan məlumatlar seçki prosesi ərəfəsində "Barselona"nın imicinə xələl gətirmək və demokratik prosesə təsir etmək məqsədi daşıyır. Bununla bağlı "göy-qırmızılar" saxta sənəd təqdim edən və böhtan atan şəxslərə qarşı dərhal hüquqi addımlar atacaqlarını, həmçinin bu məlumatları yayan media qurumlarına qarşı sərt tədbirlər görüləcəyini bəyan edib.
Qeyd edək ki, "Barselona" rəhbərliyi seçki komissiyasına bütün lazımi sənədləri təqdim edərək namizədləri yalan xəbərlərdən istifadə etməməyə çağırıb.
