İlk dəfə açıqlanır: Bu dəhşətli qışda Ukraynanı Azərbaycan ölümdən xilas edib

Ukraynanın Baş naziri Denis Şmıqalın rəhbərlik etdiyi geniş tərkibli nümayəndə heyəti Azərbaycana səfər edib.  

TodayPress TV  xəbər verir ki, heyətin tərkibinə Ukraynanın Baş nazirinin müavini, energetika naziri, iqtisadiyyat naziri, “Naftoqaz”ın rəhbəri və ölkənin aparıcı şirkətlərinin nümayəndələri daxildir. 

Səfər çərçivəsində çıxış edən Baş nazir Denis Şmıqal Azərbaycanın Ukraynaya göstərdiyi enerji dəstəyinin miqyasını açıqlayıb. O, ötən qış Ukraynanın enerji infrastrukturuna edilən hücumlardan sonra Azərbaycanın göstərdiyi yardımı yüksək qiymətləndirib.

"Azərbaycanın yardımı qışı keçirməyimizə çox kömək etdi; azərbaycanlı dostlarımız ukraynalıların bu qış donmaması və sosial obyektlərimizin fəaliyyətini davam etdirməsi üçün mühüm töhfə verdilər",- nazir qeyd edib.

Səfər çərçivəsində ikitərəfli əlaqələrin, xüsusilə enerji və iqtisadiyyat sahələrində əməkdaşlığın daha da dərinləşdirilməsi istiqamətində müzakirələrin aparılması nəzərdə tutulur.  

Qeyd edək ki, Azərbaycan müharibənin ən çətin dövrlərində Ukraynaya real dəstək göstərib.

Rusiya - Ukrayna müharibə başlayandan bəri Azərbaycan Ukraynaya 11 enerji dəstək paketi göndərib. Həmin paketlər çərçivəsində yüzlərlə generator və transformator, milyonlarla metr kabel və digər zəruri avadanlıqlar təhvil verilib. 

Məlumata görə, Azərbaycanın Ukraynaya göstərdiyi ümumi humanitar və enerji yardımının həcmi 45 milyon ABŞ dollarını ötüb.

Müşahidəçilərin fikrincə, bu səfər Azərbaycan və Ukrayna arasında, xüsusilə enerji sahəsində əməkdaşlığın daha da genişlənəcəyindən xəbər verir.

Jalə Rövşən