"Harada olsaq da, biz azərbaycanlıyıq" - Ramiz Yunus yazır...

31 dekabr təkcə Yeni il deyil. Bu tarix eyni zamanda Dünya azərbaycanlılarının Həmrəylik Günü, Azərbaycanın rəsmi dövlət bayramı və harada yaşamasından asılı olmayaraq, milyonlarla həmvətənimizi birləşdirən bir gündür.

Vətən nədir?

Mənim üçün Vətən — sevimli Bakımdakı evimdir; valideynlərimin sayəsində doğulub böyüdüyüm şəhərdir. Bu, mənim dilimdir, mədəniyyətimdir, doğma Azərbaycanımdır, köçməmişdən əvvəl həyatımın 43 ilini yaşadığım, başdan-başa gəzib tanıdığım ölkədir.

Sergey Yeseninin “Qadına məktub” şeirində belə misralar var:

“Üz-üzə dayananda üz görünməz,

Böyük olan uzaqdan daha aydın görünər".

Bu sözlərin dərin mənasını mən məhz yad ellərdə, vətəndən uzaqda ikən həqiqətən anladım. Okeanın o tayına, Vətəndən minlərlə kilometr uzağa düşəndə başa düşdüm ki, onu nə qədər çox sevirəm, şəhərimə, doğma Azərbaycanıma, onun dilinə və mədəniyyətinə nə qədər bağlıyam və valideynlərim üçün nə qədər darıxıram. Elə buna görə də deyirlər ki, insan dəyəri yalnız itirdikdən sonra anlayır.

İkinci Qarabağ müharibəsi dünyadakı milyonlarla azərbaycanlı üçün elə bir dönüş nöqtəsi oldu ki, biz bir millət, vahid bir ölkə kimi həqiqətən birləşə bildik və Vətən müharibəsində qələbə qazandıq.

Məhz cəmiyyətin — həm hakimiyyətin, həm də xalqın, siyasi baxışlarından və dini mənsubiyyətindən asılı olmayaraq — bu birliyi və həmrəyliyi bizə doğma Azərbaycanımızın suverenliyini və ərazi bütövlüyünü tam şəkildə bərpa etməyə imkan verdi.

Əziz həmvətənlərim, bu gün mürəkkəb və dalğalı qlobal siyasi şəraitdə, xüsusən də yaxın coğrafiyamızda mövcud olan risklər və çağırışlar fonunda hamımıza arzu edirəm ki, Vətənimizlə bağlı hər şeyə — onun müstəqilliyinə, dilinə, mədəniyyətinə və milli birliyinə daha böyük həssaslıq və qayğı ilə yanaşaq. Son illərdə bu qədər parlaq şəkildə özünü göstərmiş həmrəyliyi və birliyi uzun illər qoruyub saxlamaq son dərəcə vacibdir, çünki məhz bunda Azərbaycanımızın sülhünün, sabitliyinin və rifahının əsası yatır.

ABŞ-nin 35-ci prezidenti Con Fitscerald Kennedinin dediyi kimi:

“Ölkənizdən sizin üçün nə edə biləcəyini soruşmayın, özünüzdən ölkəniz üçün nə edə biləcəyinizi soruşun”. 

(Xəzər Universitetinin siyasi elmlər üzrə professoru Ramiz Yunus).