Abituriyentləri narahat edən təklif: Haqqını tələb etmək ödənişli olacaq?

Dövlət İmtahan Mərkəzinin İdarə Heyətinin sədri Məleykə Abbaszadənin apellyasiya müraciətlərinin ödənişli edilməsi ilə bağlı səsləndirdiyi fikir ictimaiyyətdə müzakirələrə səbəb olub.

Məsələ ilə bağlı TodayPress TV-yə danışan təhsil eksperti Ramin Nurəliyev bildirib ki, hazırda apellyasiya prosesində müraciətlərin çoxluğu normal haldır və bu, əsasən yoxlama prosesində insan faktorunun mövcudluğu ilə bağlıdır.

Ekspertin sözlərinə görə, qəbul imtahanlarında açıq tipli suallar markerlər tərəfindən yoxlanıldığı üçün müəyyən səhvlərin baş verməsi qaçılmazdır:

“Dövlət İmtahan Mərkəzi apellyasiya müraciətlərinə baxdıqdan sonra bəzi iştirakçıların haqlı olduğunu qəbul edir və onlara əlavə bal verir. Bu isə göstərir ki, markerlərin yoxlamasında müəyyən səhlənkarlıq və ya diqqətsizlik halları ola bilir. Apellyasiya mexanizmi də məhz bu cür halların aradan qaldırılması üçün nəzərdə tutulub”.

Ramin Nurəliyev hesab edir ki, əgər gələcəkdə apellyasiya müraciətləri ödənişli əsaslarla qəbul olunacaqsa, bu zaman müraciətçilərlə birbaşa əlaqə yaradılması vacibdir:

“Mən düşünürəm ki, apellyasiya mərhələsində müraciətlər ödənişli olacaqsa, müraciətçi mütləq dinlənilməlidir. Hazırda isə müraciətçi ilə birbaşa ünsiyyət qurulmadan, apellyasiya komissiyası tərəfindən qərar verilir”.

Ekspert əlavə edib ki, apellyasiya sistemində şəffaflığın və iştirakçıların prosesə cəlb olunmasının artırılması daha məqsədəuyğun olardı.

Xanım Musayeva