Amsterdamda tarixi qadağa: Ət reklamları yığışdırıldı
Niderlandın paytaxtı Amsterdam şəhərinin rəhbərliyi ət və qazıntı yanacağı məhsullarının küçə reklamına tarixi qadağa tətbiq edərək, dünyada belə bir qərar qəbul edən ilk paytaxt olub.
TodayPress TV xəbər verir ki, bu barədə BBC telekanalı məlumat yayıb.
Mayın 1-dən etibarən burger və aviabilet reklamları lövhələrdən, eləcə də avtobus dayanacaqlarından yığışdırılaraq muzey və konsert afişaları ilə əvəz olunub. Şəhər rəsmiləri izah ediblər ki, bu addım 2050-ci ilə qədər karbon neytrallığına nail olmaq planının tərkib hissəsidir. "Yaşıl sollar" partiyasının təmsilçisi Anneke Veenhoff bildirib ki, ictimai sahələri ekologiyanın "rəqiblərinə" icarəyə vermək iqlim siyasəti yürüdən liderlər üçün ziddiyyətli addım olardı.
Qadağanın təşəbbüskarı olan "Heyvanlar üçün Partiya"nın üzvü Anke Bakker şəxsi həyata müdaxilə ittihamlarını rədd edib. Onun sözlərinə görə, hakimiyyət orqanları sadəcə böyük şirkətlərin insanların qidalanma və alış-veriş seçimlərinə diktə etməsinin qarşısını almağa çalışır. Beləliklə, şəhər sakinlərinə daimi vizual təzyiq olmadan real seçim azadlığı qaytarılır.
Niderland Ət İstehsalçıları Assosiasiyası bu addımı istehlakçılara qarşı arzuolunmaz təzyiq forması adlandırıb və onlara ətin sağlamlıq üçün faydalarını xatırladıb. Fəal Hanna Prins isə baş verənləri "tütün dövrü" ilə müqayisə edib. O qeyd edib ki, vaxtilə xərçəngdən vəfat edən futbolçu Yohan Kroyffun təsvir olunduğu siqaret reklamları belə normal hesab edilirdi, lakin zamanla bu yanaşma dəyişdi.
