Ölkəyə kiberhücumlar artır - Prezidentin yaratdığı qurumun hədəfləri

Azərbaycan Respublikası Prezidentinin 2026-cı il 2 iyun tarixli Fərmanı ilə Milli Kibertəhlükəsizlik Agentliyinin Nizamnaməsi  təsdiq edilib.

Azərbaycan Respublikasının Milli Kibertəhlükəsizlik Agentliyi (MKA) ölkənin rəqəmsal təhlükəsizliyinin təmin edilməsində əsas tənzimləyici və koordinasiyaedici qurum kimi fəaliyyət göstərir.

Rəqəmsal İnkişaf və Nəqliyyat Nazirliyinin tabeliyində publik hüquqi şəxs statusuna malik olan Agentlik kibertəhlükəsizlik sahəsində dövlət siyasətinin həyata keçirilməsini təmin edir.

Agentliyin əsas məqsədi ölkənin rəqəmsal məkanında dayanıqlılığı gücləndirmək, kiberhücumların qarşısını almaq və informasiya sistemlərinin təhlükəsizliyini artırmaqdır. MKA bu istiqamətdə həm dövlət qurumları, həm də özəl sektor və vətəndaşlarla əməkdaşlıq edir.

Qurumun fəaliyyət sahələri arasında milli kompüter insidentlərinə qarşı mübarizə mərkəzinin (CERT) işinin təşkili, kibertəhdidlərin aşkarlanması və aradan qaldırılması, normativ-hüquqi aktların hazırlanması, fərdi məlumatların qorunması və internet mühitində qanunsuz məzmunun məhdudlaşdırılması yer alır.

Bununla yanaşı, Agentlik ölkədə kibertəhlükəsizlik mədəniyyətinin formalaşdırılması istiqamətində maarifləndirmə tədbirləri həyata keçirir, vətəndaşlara və təşkilatlara metodiki dəstək göstərir.

MKA İdarə Heyətinin sədri və üç müavindən ibarət idarəetmə strukturu vasitəsilə fəaliyyət göstərir. Agentliyin maliyyə təminatı dövlət büdcəsi, qrantlar, ianələr və qanunvericiliklə qadağan olunmayan digər mənbələr hesabına formalaşdırılır. 

Ekspertlər hesab edirlər ki, MKA-nın fəaliyyət modeli dövlət tənzimlənməsi ilə çevik idarəetmə arasında balans yaradaraq ölkənin kiberdayanıqlılığının artırılmasına xidmət edir. Agentlik digər aidiyyəti qurumlarla koordinasiyalı şəkildə çalışaraq təhlükəsiz və dayanıqlı rəqəmsal mühitin formalaşdırılmasını hədəfləyir. 

Jalə Rövşən