Azərbaycan hökumətlərin süni intellektdən istifadəyə hazırlıq indeksində irəlilədi
"Oxford Insights" şirkətinin tərtib etdiyi 2025-ci ildə hökumətlərin süni intellektin (AI) tətbiqinə hazırlıq indeksinə əsasən, Azərbaycan 111-ci pillədən 70-ci pilləyə yüksəlib.
TodayPress TV "Oxford Insights"a istinadən xəbər verir ki, ölkənin ümumi balı 48,96 təşkil edib.
Müqayisə üçün, 2024-cü ildə bu göstərici 39,92-yə bərabər olub.
İndeks çərçivəsində Azərbaycan ayrı-ayrı kateqoriyalar üzrə aşağıdakı balları toplayıb: "Dövlət siyasəti potensialı" - 53,5, "AI infrastrukturu" - 46,21, "İdarəetmə" - 50, "Dövlət sektorunda AI-nin tətbiqi" - 66,97, "İnkişaf və yayılma" - 34,73, "Dayanıqlıq" - 58,27.
Qeyd etmək lazımdır ki, Azərbaycan indeksdə Cənubi Qafqaz ölkələri arasında lider mövqedədir, Mərkəzi Asiya ölkələri arasında üçüncü yerdə qərarlaşıb. Belə ki, Ermənistan 37,17 balla 108-ci, Gürcüstan 43,1 balla 84-cü, Qazaxıstan 55,86 balla 60-cı, Özbəkistan 54,69 balla 62-ci, Tacikistan 27,37 balla 135-ci, Qırğızıstan 33,69 balla 116-cı, Türkmənistan isə 20,75 balla 166-cı yerdədir.
Bütövlükdə, Cənubi və Mərkəzi Asiya regionunda (regionun qlobal reytinqi - 6-cı yer, orta bal - 41,41) Azərbaycan 5-ci yeri tutaraq Hindistan (67,9 bal), Türkiyə (58,1), eləcə də Qazaxıstan və Özbəkistandan geri qalıb. Eyni zamanda ölkə Banqladeş (47,4), Pakistan (46), Şri-Lanka (44,4), Butan (38,6), Nepal (37,5), Maldiv adaları (25,9), Əfqanıstan (16,4) kimi dövlətləri qabaqlayıb.
