Doha görüşündən gözləntilər: “Ermənistan əməkdaşlıq istəyirsə...”
Azərbaycan Prezidentinin köməkçisi Hikmət Hacıyev və Ermənistan Təhlükəsizlik Şurasının katibi Armen Qriqoryan dekabrın 5-də Dohada görüşəcək. Bu barədə Ermənistanın Təhlükəsizlik Şurası məlumat yayıb. Məlumata görə, tərəflər “Ermənistan və Azərbaycan arasında davamlı sülh: Vaşinqton sazişi və ortaq gələcək” mövzusunda panel müzakirəsində iştirak edəcəklər.
Maraqlıdır, görüşdən real gözləntilər nələrdir və bu panel müzakirəsi sülh prosesinə praktiki təsir göstərə bilərmi?
Sözügedən məsələ ilə bağlı TodayPress TV-yə danışan politoloq Zeynal Əmrəliyev bildirib ki, görüşün əsas mövzusu sülh müqaviləsinin şərtləri olacaq:
"Hacıyev və Qriqoryanın görüşündə, şübhəsiz ki, əsas müzakirə mövzusu Azərbaycan və Ermənistan arasında sülh müqaviləsinin imzalanması ilə bağlı əldə olunmuş razılığın şərtləri olacaq. Bu çərçivədə iki tərəf arasında sülh müqaviləsinin indiki vəziyyəti və gələcək əməkdaşlıq perspektivləri müzakirə ediləcək".
Ekspert qeyd edib ki, İrəvan ərazi iddialarını ləğv etməyə razılaşıb:
"Məlum olduğu kimi, Ermənistan Vaşinqton görüşünda üzərinə öhdəlik götürüb. Həmin öhdəliklərdə Ermənistan Konstitusiyasındakı bəzi maddələrin dəyişdirilməsi barədə fikirlər yer alır. Bu maddələr konkret olaraq Azərbaycanın və Türkiyənin ərazi bütövlüyünə hörmət məsələsinə aiddir. Ermənistan Konstitusiyasının preambulasında faktiki olaraq Azərbaycana və Türkiyəyə qarşı kəskin ərazi iddiaları əks olunub. Həmin maddələrin Konstitusiyadan çıxarılması vacibdir ki, gələcəkdə revanşist dairələr üçün yeni iddialar və gərginlik yaratmaq imkanı qalmasın".
Analitik bildirib ki, Ermənistan əməkdaşlıq istəyirsə, Zəngəzur dəhlizinə mane olan qüvvələri dayandırmalıdır:
"Eyni zamanda, Ermənistanda “Tramp dəhlizi” — yəni Zəngəzur dəhlizinin açılmasına mane olmaq istəyən qüvvələr mövcuddur. Bu qüvvələrin səsi kəsilməlidir. Ermənistan hökuməti Azərbaycanla yüksək səviyyəli əməkdaşlıq istəyirsə və bu əməkdaşlıq üçün real imkanlar axtarırsa, iki ölkə arasında münasibətlərin normallaşması üçün lazım olan addımları atmalı, öhdəliklərini yerinə yetirməli və etimad mühitinin yaranmasına dəstək verməlidir".
Onun sözlərinə görə, Ermənistan Təhlükəsizlik Şurasının katibi ilə Azərbaycan Prezidentinin xarici siyasət məsələləri üzrə köməkçisinin görüşü zamanı bütün bu məsələlərin geniş şəkildə müzakirə ediləcəyi və Azərbaycan tərəfinin istəkləri, haqlı iradlarının Ermənistan tərəfinə çatdırılacağı gözlənilir.
Zeynal Əmrəliyev, həmçinin vurğulayıb ki, hazırda tərəflər arasında sakitlik var:
"Ümumi vəziyyətə nəzər saldıqda, hazırda Azərbaycan və Ermənistan arasında vəziyyət nisbətən stabildir. Cəbhədə uzun müddətdir atəşkəsin pozulmaması çox mühüm göstəricidir və etimad mühitinin formalaşması üçün yaxşı fürsətdir. Həmçinin hər iki ölkənin ictimai xadimlərinin qarşılıqlı səfərləri xüsusi əhəmiyyət kəsb edir. Bu səfərlərdə əldə olunan razılaşmaların və keçirilən görüşlərin nəticələrinin də Hikmət Hacıyev və Armen Qriqoryanın görüşündə müzakirə ediləcəyi gözlənilir".
Jalə Rövşən
