RUSİYA qapandıqca qapanır - ötən həftə ölkə nələri yaşadı?
Aprelin 3-dən 9-dək olan həftədə Rusiya mediasının gündəmini əsasən internet məhdudiyyətləri, Ukrayna münaqişəsi və daxili sosial-iqtisadi dəyişikliklər müəyyən edib.
TodayPress TV-nin araşdırmasına əsasən, ən çox müzakirə olunan mövzu “suveren internet” siyasəti çərçivəsində atılan addımlar olub.
VPN istifadəsinə qarşı yeni qaydalar, beynəlxalq internet trafikinə mümkün ödəniş tətbiqi, Apple ID balansının doldurulmasına məhdudiyyətlər və aprelin 15-dək bəzi platformalarda VPN istifadəçilərinin bloklanması planları geniş rezonans doğurub. Eyni zamanda Telegram-a təzyiqlər və yerli MAX messencerinin təşviqi də diqqət mərkəzində olub.
Ukrayna ilə münaqişə (Rusiyada “SVO” kimi təqdim olunur) isə ənənəvi olaraq əsas xəbər axınında yer alıb. Cəbhə bölgələrində vəziyyət, dron hücumları, Donbass və sərhəd ərazilərində baş verən hadisələr, eləcə də tərəflərin açıqlamaları aparıcı media qurumları tərəfindən geniş işıqlandırılıb.
Həftə ərzində təbii fəlakətlər də gündəmdə olub. Dağıstan və Çeçenistanda baş verən güclü sel nəticəsində yaşayış məntəqələri zərər görüb, bəzi ərazilərdə fövqəladə vəziyyət rejimi tətbiq olunub.
Daxili siyasətdə isə apreldə qüvvəyə minən yeni qanunlar müzakirə edilib. Sosial pensiyaların 6,8 faiz artırılması, mikrokredit qaydalarının dəyişməsi, nağd rublun bəzi ölkələrə çıxarılmasının məhdudlaşdırılması kimi qərarlar diqqət çəkib. Bununla yanaşı, inflyasiya və istehlakın azalması ilə bağlı narahatlıqlar da media gündəmində yer alıb.
Beynəlxalq mövzular arasında ABŞ-İran münasibətləri, Yaxın Şərqdə gərginlik və BMT-də baş verən diplomatik proseslər geniş işıqlandırılıb. Rusiya mediası bu hadisələri əsasən Qərbin zəifləməsi kontekstində təqdim edib.
Jalə Rövşən
