Ermənistan parad istəyir: Məğlub ordu nəyi nümayiş etdirəcək?
Ermənistanda hərbi parad keçirilməsi məsələsi yenidən ictimai və siyasi müzakirələrin gündəminə çıxıb. Baş nazir Nikol Paşinyan parlamentdə hökumət saatı zamanı məsələ ilə bağlı müxtəlif fikirlərin səsləndiyini bildirib.
“Armenpress”in məlumatına görə, Paşinyan cəmiyyətdə bir qrupun paradın keçirilməsini dəstəklədiyini, digər qrupların isə buna qarşı çıxdığını deyib. O qeyd edib ki, Azərbaycanda keçirilən Zəfər paradından sonra bu mövzu Ermənistanda da aktuallaşıb. Baş nazirin sözlərinə görə, hökumət sülh gündəliyinə fokuslansa da, ictimaiyyətin yanlış məlumatlardan qorunması üçün informasiya təhlükəsizliyi təmin olunmalıdır. Paşinyan bildirib ki, qərar verildiyi halda parad kifayət qədər təsirli ola bilər.
O əlavə edib ki, əhalinin yeni alınan hərbi texnikaları görmək istəyinin böyük olması səbəbindən bu məsələ ilə bağlı hökumətə çoxsaylı müraciətlər daxil olub.
Bu halda suallar yaranır: 44 günlük müharibədə ağır məğlubiyyət yaşayan Ermənistanın bu gün hərbi parad keçirmək istəyi nə ilə izah oluna bilər. Ümumiyyətlə, paradla nümayiş etdirəcək real hərbi güc varmı, yoxsa bu, daha çox daxili auditoriyaya ünvanlanan siyasi görüntüdür?
Məsələ ilə bağlı TodayPress TV-yə danışan politoloq Anar İsayev bildirib ki, Ermənistanın hazırkı vəziyyəti və 44 günlük müharibədən sonra formalaşan reallıq hərbi parad ideyasının mahiyyətini daha aydın göstərir:
“44 günlük müharibədən sonra Ermənistan ordusunun 60 faizdən çox silah-sursatı məhv edilib və ya Azərbaycan tərəfindən ələ keçirilib, qalan texnika və hava hücumundan müdafiə sistemləri isə köhnəlib. Demək olar ki, heç bir yenilənmə baş verməyib. Orduda struktur islahatları aparılsa da, bu proses hələ real nəticə verməyib. Dronlar, artilleriya və HHM sistemləri də daxil olmaqla yeni hərbi texnologiyalar üzrə Ermənistan həm Azərbaycandan, həm də hətta Gürcüstandan geri qalır”.
Ekspertin sözlərinə görə, Ermənistanın bu gün nümayiş etdirə biləcəyi hərbi gücün çox məhdud olması parad ideyasının mahiyyətini dəyişir:
“Parad hərbi qüdrətin nümayişi deyil, daha çox daxili auditoriyaya hesablanmış siyasi-psixoloji mesajdır. Belə tədbirlər adətən ictimai psixologiyanı yönləndirmək, hökumətin nüfuzunu artırmaq və “məğlubiyyət sindromu”nu yumşaltmaq üçün istifadə olunur”.
Anar İsayev qeyd edib ki, Paşinyan hökuməti parad vasitəsilə cəmiyyətə konkret mesajlar vermək niyyətindədir:
“Paşinyan “məğlub olsaq da, ordumuz dirçəlir”, “Yeni Ermənistan ordusu formalaşır” kimi fikirləri gücləndirməyə çalışır. Paradın əsas ünvanı Ermənistan cəmiyyətidir — xüsusən də revanşist qruplar, müxalifət və ordudakı narazı dairələr”.
Analitik vurğulayıb ki, Ermənistanın hazırda real hərbi güc nümayiş etdirmək imkanı yoxdur və paradın məqsədi daha çox psixoloji təsir yaratmaqdır:
“Bu, hərbi güc nümayişi deyil, məğlubiyyət kompleksini aradan qaldırmaq və cəmiyyətdə özünəinamı bərpa etmək cəhdidir. Ermənistanın gerçək imkanları parad miqyasında təqdim ediləcək səviyyədə deyil”.
Qiymət Mahir
