Azərbaycan-Ermənistan sərhədində təxribat gözlənilir?
İyunun 7-də Ermənistanda keçiriləcək parlament seçkiləri ərəfəsində Azərbaycan-Ermənistan sərhədində revanşist qüvvələrin mümkün təxribatları ilə bağlı narahatlıqlar yenidən aktuallaşıb. Seçki prosesində daxili siyasi gərginliyin artması fonunda bəzi revanşist dairələrin sərhəddə qarşıdurma yaratmağa cəhd göstərə biləcəyi ehtimalları istisna olunmur.
Maraqlıdır belə bir ehtimal nə dərəcədə realdır?
Məsələ ilə bağlı hərbi ekspert Ədalət Verdiyev TodayPress TV-yə açıqlamasında vəziyyəti nisbətən sabit qiymətləndirib.
O qeyd edib ki, Ermənistan ordusunda son vaxtlar intizamın möhkəmləndirilməsi istiqamətində ciddi addımlar atılır:
"Ermənistanın Baş naziri Nikol Paşinyan Ermənistan ordusunda intizamın möhkəmləndirilməsi üçün kifayət qədər ciddi addımlar atıb. Ən azından bizim müşahidələrimiz ehtimal etməyə əsas verir ki, seçki günündə də Ermənistan tərəfindən təxribatlar olmayacaq".
Ekspert əlavə edib ki, istənilən halda, silahlı qüvvələrimizin Ermənistanla sərhəddə yerləşən hissə və bölmələri, mümkün təxribatların qarşısını almaq üçün zəruri olan bütün tədbirləri həyata keçirəcək.
Onun sözlərinə görə, hazırda Azərbaycan ilə Ermənistan arasında mövcud əməliyyat şəraiti kifayət qədər sabitdir.
Jalə Rövşən
