“Sabah”ın Simiçi Çempionlar Liqasında tarixə düşdü

“Sabah”ın serbiyalı yarımmüdafiəçisi Velko Simiç UEFA Çempionlar Liqasında Azərbaycan futbolu adına rekorda imza atıb.

TodayPress TV Peşəkar Futbol Liqasına (PFL) istinadən xəbər verir ki, Simiç Çempionlar Liqasının pley-off mərhələsində “Hapoel Beer Şeva” ilə səfər oyununda (1:2) komandasının yeganə qolunu vurub.

Beləliklə, 30 yaşlı futbolçu UEFA Çempionlar Liqasında ardıcıl 5 oyunda qol vuran ilk oyunçu kimi Azərbaycan futbolu tarixinə düşüb.

Simiç cari mövsüm turnirin II təsnifat mərhələsində Finlandiyanın “KuPS” klubuna qarşı keçirilən hər iki görüşdə (1:0, 2:0) fərqlənib. Daha sonra III təsnifat mərhələsində Danimarkanın “Orhus” komandası ilə matçlarda da rəqib qapısına yol tapıb.

Namiq HUN

TodayPress TV