Səbəbsiz çəki itkisi ciddi xəstəliklərin əlaməti ola bilər
Pəhriz və fiziki aktivlikdə dəyişiklik etmədən çəki itirmək bəzən orqanizmdə gedən ciddi proseslərin xəbərçisi ola bilər.
TodayPress TV xəbər verir ki, mütəxəssislər xüsusilə qısa müddətdə nəzərəçarpacaq çəki itkisinə diqqət yetirməyi tövsiyə edirlər.
Tibbi praktikada insanın təxminən altı ay ərzində ilkin bədən çəkisinin 5-10 faizini səbəbsiz şəkildə itirməsi diqqət tələb edən göstərici hesab olunur. Bununla belə, çəkinin qısa müddətli dəyişməsi hər zaman xəstəliklə əlaqəli olmur. Maye qəbulu, qidalanma vərdişləri və fiziki aktivlik çəkidə müvəqqəti dəyişikliklər yarada bilər.
Uzunmüddətli və izah olunmayan arıqlama zamanı isə əlavə əlamətlərə diqqət yetirmək vacibdir. Geyimlərin nəzərəçarpacaq dərəcədə boşalması, əzələ kütləsinin azalması, davamlı zəiflik və iştahsızlıq xəbərdarlıq siqnalları ola bilər.
Çəki itkisinə səbəb olan amillər müxtəlifdir. Uzunmüddətli stress, depressiya, narahatlıq və yuxu problemləri iştahın azalmasına gətirib çıxara bilər. Yaşlı insanlarda isə diş və udma problemləri, həmçinin dad hissinin zəifləməsi qida qəbulunun azalmasına səbəb ola bilər.
Hansı hallarda həkimə müraciət etmək lazımdır?
Səbəbsiz çəki itkisi aşağıdakı simptomlardan biri və ya bir neçəsi ilə müşayiət olunursa, tibbi müayinə vacibdir:
- getdikcə artan zəiflik;
- qızdırma və gecə tərləmələri;
- limfa düyünlərinin böyüməsi;
- səbəbsiz göyərmə və çürüklər;
- davamlı ağrı;
- udma çətinliyi;
- uzunmüddətli ishal və ya qusma.
Mütəxəssislər bildirirlər ki, çəki itkisi təkbaşına konkret xəstəliyin göstəricisi deyil. Buna görə də belə hal aşkarlandıqda dərhal ən pis ehtimalları düşünmək əvəzinə, səbəbi mərhələli şəkildə araşdırmaq lazımdır.
İlkin mərhələdə terapevt və ya ailə həkiminə müraciət etmək tövsiyə olunur. Müayinənin bir hissəsi kimi ümumi və biokimyəvi qan analizləri, qaraciyər və böyrək funksiyalarının qiymətləndirilməsi, qlükoza, iltihab göstəriciləri və qalxanabənzər vəz hormonlarının yoxlanılması aparıla bilər.
Türkan İsgəndərli
