“Yuventus”un yeni istedadı Del Pyeronun diqqətini çəkdi

İtaliya millisinin və “Yuventus”un sabiq hücumçusu Alessandro Del Pyero Bosniya və Herseqovina millisinin 18 yaşlı forvardı Kerim-Sem Alaybeqoviçin Turin klubuna transferinə münasibət bildirib.

TodayPress TV xəbər verir ki, bu barədə “Sky Sport Italia” məlumat yayıb.

Del Pyero gənc futbolçunun keçidindən məmnun olduğunu deyib. O, Alaybeqoviçin yüksək oyun keyfiyyətlərinə malik olduğunu və gənc yaşının transferi “Yuventus” üçün üstünlüyə çevirdiyini vurğulayıb.

“Bu yeni istedadla bağlı çox şadam. İlk növbədə, o, yüksək oyun keyfiyyətlərinə malik futbolçudur. Digər tərəfdən, çox gəncdir. Buna görə də onun transferi böyük üstünlükdür. İtaliya liqasında istedadlı futbolçuları tapmaq getdikcə çətinləşir, çünki onlar başqa ölkələrin klubları tərəfindən cəlb olunur.

Ümid edək ki, o, özünü yaxşı göstərəcək, inkişafı üçün kifayət qədər vaxtı olacaq və üzərinə erkən yaşda həddindən artıq təzyiq göstərilməyəcək. Bunun heç bir mənası yoxdur. Bunlar çox vacib məqamlardır. Düşünürəm ki, Spallettinin Alaybeqoviçə şans vermək və onu yaxından izləmək üçün mövsüm ərzində imkanları olacaq”, – deyə Del Pyero bildirib.

Namiq HUN