Opera və Balet Teatrı “Sevgi iksiri” operasını təqdim etdi
Bakı Musiqi Akademiyasının Opera studiyasının səhnəsində görkəmli italyan bəstəkarı Qaetano Donissettinin “Sevgi iksiri” (L’elisir d’amore) operası təqdim olunub.
TodayPress TV xəbər verir ki, “Sevgi iksiri” bəstəkarın italyan opera-buffa ənənələrində yazılmış ən yaxşı komik operalarından biridir.
Donissetti olduqca “məhsuldar” bəstəkar idi və sözün əsl mənasında, onlarla opera yaradırdı. “Sevgi iksiri” bu günə qədər təsdiqlənmiş 70 operası arasında yazdığı 40-cı əsərdir. Bəstəkar bu operanı qələmə alanda cəmi 34 yaşında idi.
1832-ci il mayın 12-də Milanda, “Teatro alla Canobbiana” səhnəsində keçirilən premyeradan bəri bu opera dünya opera teatrlarının standart repertuarını tərk etmir və dünyanın ən çox səhnələşdirilən iyirmi operası sırasında yer almaqda davam edir.
“Sevgi iksiri” Bakı tamaşaçılarına ilk dəfə 2013-cü ildə Üzeyir Hacıbəyli adına Beynəlxalq Musiqi Festivalı çərçivəsində Azərbaycan Dövlət Akademik Opera və Balet Teatrı tərəfindən təqdim edilib. Tamaşanın quruluşçu rejissoru dəvət olunmuş istedadlı ukraynalı opera rejissoru Nikola Tret¬yak idi.
Noyabrın 14-də nümayiş olunan tamaşada baş rol olan Nemorino obrazını Azərbaycanın Əməkdar artisti Fərid Əliyev ifa edib. O, düşüncəli, utancaq və həssas bir gəncin xarakterini dəqiq şəkildə canlandırıb. Aydan Quliyeva isə digər aparıcı rol — Adina obrazını ifa edib və nazlanmağı sevən, əlçatmaz görünməyə çalışan, lakin daxilən sadə və vurğun bir qızın xarakterini tamaşaçılara uğurla çatdırıb.
Çavuş Belkore rolunda Azərbaycanın Əməkdar artisti Anton Ferştandt çıxış edərək, qoçaq və cəngavər görkəmli bir əsgərin karikaturalı obrazını yaradıb. Şarlatan həkim Dulkamara obrazında isə Azərbaycanın Xalq artisti Əkrəm Poladov səhnəyə çıxıb, səs imitasiya və söz oyunu ustalığını böyük zövqlə oynayıb. Opera truppasının solisti Nina Makarova Adinanın rəfiqəsi Canetta rolunda qəhrəmanın “həyatda yaxşı mövqe tutmaq” fürsətini əldən verməyən xarakterini inandırıcı şəkildə canlandırıb.
Tamaşaya xüsusi rəng qatan məqam isə Əməkdar incəsənət xadimi Sevil Hacıyevanın rəhbərliyi ilə çıxış edən xor kollektivinin peşəkarlığı olub.
Səhnə əsəri Azərbaycan Dövlət Akademik Opera və Balet Teatrının orkestrinin müşayiəti ilə, Azərbaycanın Xalq artisti Fəxrəddin Kərimovun dirijorluğu altında nümayiş etdirilib.
Tamaşanın quruluşu üzərində, həmçinin Opera və Balet Teatrının baş rejissoru, Əməkdar incəsənət xadimi Hafiz Quliyev çalışıb.
PHOTOS
