Yannik Sinner “US Open – 2025” mikst turnirindən çıxdı

Dördqat “Böyük Dəbilqə” qalibi, dünya reytinqinin lideri olan italiyalı tennisçi Yannik Sinner “US Open – 2025” çempionatında bu gün start götürəcək qarışıq cütlüklər yarışından çıxıb. 

TodayPress TV xəbər verir ki, bu barədə italiyalı jurnalist Covanni Pelatso sosial şəbəkələrdə məlumat yayıb.

Qeyd edək ki, mikst qarşılaşmaları avqustun 19–20-də keçiriləcək. Əsas turnir isə avqustun 24-dən sentyabrın 7-dək davam edəcək. Hazırda “US Open”in təkli kateqoriyasında çempionlar Yannik Sinner və Arina Sobolenkadır.

Xatırladaq ki, Sinner ötən gün Sinsinnatidə keçirilən finalda ispaniyalı Karlos Alkarasla görüşdə səhhətində yaranan problemlərə görə görüşü yarımçıq saxlamışdı. Final matçı ilk setdə 5:0 hesabı ilə Alkarasın xeyrinə yekunlaşmışdı.

Namiq HUN