Şarl Lekler ikinci yarı öncəsi azarkeşlərə mesaj verdi
“Ferrari” komandasının pilotu Şarl Lekler “Formula-1” üzrə 2026-cı il mövsümünün ilk yarısını dəyərləndirib.
TodayPress TV xəbər verir ki, monakolu pilot sosial şəbəkə hesabında paylaşdığı açıqlamada çempionatın ilk hissəsində həm yaddaqalan, həm də çətin anların yaşandığını bildirib.
“Mövsümün ilk yarısı geridə qaldı. Xüsusi anlar da oldu, xoş olmayan məqamlar da. İndi isə bir qədər istirahət edib güc toplamaq və mövsümün ikinci yarısına tam hazır qayıtmaq vaxtıdır”, – deyə Lekler yazıb.
Qeyd edək ki, Şarl Lekler bu mövsüm yeganə qələbəsini Böyük Britaniya Qran-prisində qazanıb. O, həmçinin Avstraliya və Yaponiya mərhələlərində üçüncü, Belçika Qran-prisində isə ikinci yeri tutaraq ümumilikdə üç dəfə podiuma yüksəlib.
11 mərhələdən sonra Lekler pilotlar arasında ümumi sıralamada 4-cü pillədə qərarlaşıb. O, çempionatın lideri, “Mercedes” komandasının pilotu Andrea Kimi Antonellidən 81 xal geri qalır.
Namiq HUN
