Dartın əfsanəsi vida qərarını verdi

Dart idman növü üzrə 14 qat dünya çempionu Fil Teylor 64 yaşında karyerasını bitirdiyini açıqlayıb.

TodayPress TV xəbər verir ki, o, bu barədə sosial şəbəkə hesabında məlumat verib. 

“Son 40 ildə uzun və fantastik karyeradan sonra dartdan təqaüdə çıxdığımı elan edirəm. Bu inanılmaz yolda dəstəyinizə görə hər birinizə ayrı-ayrılıqda təşəkkür etmək istərdim. Sizin ruhlandırmanız və həvəsiniz mənim uğurlarıma təkan verən qüvvə oldu. Təsəvvür etdiyimdən daha çox şey əldə etməyimə imkan verən bir səyahət idi” Fil bildirib.

Teylor, sonuncu dəfə 2018-ci ildə peşəkar matçda iştirak edib. O, son illərdə müntəzəm olaraq sərgi və ya xeyriyyə oyunlarında çıxış edib.

Qeyd edək ki, Fil Teylor karyerası ərzində 14 dəfə dünya çempionu olub, 19 dəfə isə finala yüksəlib. O, 2010-cu ildən keçirilən Dünya Kuboku turnirinin dörd dəfə qalibi olub.

Namiq HUN