Apreldə görüşərik – Buasson yarışlara qayıdır
Dünyanın 39-cu raketkası, fransalı tennisçi Lois Buasson zədədən sonra məşqlərə qayıtdığını açıqlayıb.
TodayPress TV xəbər verir ki, o, bu barədə sosial şəbəkələrdə yazıb.
Buasson zədə səbəbindən cari mövsüm Avstraliya Açıq Turnirini buraxmalı olub.
“Son dörd ay mənim üçün çox çətin keçdi. Mövsümöncəsi məşq zamanı sağ ön qolumdan aldığım zədə, hər şeyin yaxşı getdiyi bir vaxtda, yeni mövsümə planlaşdırdığım kimi başlamağıma imkan vermədi.
Başlanğıcda yalnız bir neçə həftə kortsuz qalmalı olduğumu demişdilər, amma bir sıra mənim etmədiyim səhvlər səbəbindən zədə uzandı. Aylar boyunca bütün günlərimi müalicə, reabilitasiya və fiziki hazırlıqla keçirdim, nə vaxtsa yenidən oynaya biləcəyimi gözləyirdim… Bütün bunları qəbul etmək mənim üçün çox çətin idi və psixoloji olaraq hətta diz zədəsindən daha ağır oldu.
Amma əvvəlki kimi, yenidən qalxacağam və daha güclü şəkildə irəliləyəcəyəm. Nəhayət yenidən kortdayam! Proses uzun idi, amma artıq tunelin sonunda işığı görürəm. Apreldə görüşərik - mən sevdiyim örtükdə yarışlara qayıdıram”, - deyə Buasson sosial şəbəkələrdə yazıb.
Xatırladaq ki, ötən mövsümdə Buasson “Rolan Qarros” turnirində yarımfinala çıxmış və bu uğur sayəsində WTA reytinqində 296 pillə irəliləyərək top-70-lik sıralamaya daxil olmuşdu.
Namiq HUN
