Naxçıvanda uşağa peyvəndi səhv vurdular, izi itirmək üçün sənədləri saxtalaşdırdılar - İDDİA
AMEA Folklor İnstitutu Qərbi Azərbaycan folkloru şöbəsinin müdir müavini, filologiya üzrə fəlsəfə doktoru Elyar İslamoğlu Naxçıvanda azyaşlı uşağa səhv peyvənd vurulduğu və sonradan tibbi sənədlərin saxtalaşdırıldığı ilə bağlı iddialarla çıxış edib.
TodayPress TV xəbər verir ki, onun sözlərinə görə, sözügedən hadisədə azyaşlı uşağa səhv peyvənd vurulduğu, daha sonra isə izi itirmək və valideynləri aldatmaq məqsədilə sənədlərin saxtalaşdırıldığı iddia olunur.
Elyar İslamoğlu bildirib ki, belə iddialar cəmiyyət üçün ciddi narahatlıq doğurur və hərtərəfli araşdırılmalıdır:
“İddialara görə, azyaşlı uşağa səhv peyvənd vurulub, sonra isə izi itirmək və valideynləri aldatmaq üçün sənədlər saxtalaşdırılıb. Belə hallara görə uşaqlar peyvənddən sonra şikəst olur, danışa bilmir, qulaqları tutulur, görmə qüsuru yaranır”.
AMEA üzvü həmçinin Naxçıvan Muxtar Respublikası Prokurorluğunun məsələyə münasibətini də tənqid edib:
"Naxçıvan Muxtar Respublikası Prokurorluğu isə həmin şəxsə yalnız şiddətli töhmət verməklə kifayətlənib. Görünür, Prokurorluq əməkdaşları qanunları yaxşı bilmir. Yoxsa uşağa səhv peyvənd vuraraq onun sağlamlığını riskə atmağın, daha sonra sənədləri saxtalaşdırıb valideynə yalan məlumat verməyin cəzasının şiddətli töhmət olmadığını bilməli idilər".
Ekspert əlavə edib ki, məsələ ilə bağlı irəli sürülən iddialar obyektiv və şəffaf şəkildə araşdırılmalıdır:
"İddialar obyektiv və şəffaf araşdırılmalı, qanun pozuntusu təsdiqlənəcəyi təqdirdə isə məsul şəxslər qanun qarşısında cavab verməli, ciddi cəza olmalıdır".
Türkan İsgəndərli
PHOTOS
