Müəllimlərin işə qəbulu niyə ödənişli edilir? – AÇIQLAMA
"Müəllimlərin işə qəbulu müsabiqəsinin ödənişli olması ilk baxışdan birmənalı qarşılanmaya bilər. Lakin qərara ancaq “ödəniş” prizmasından baxmaq düzgün olmaz".
Bu fikirləri TodayPress TV-yə açıqlamasında Təhsil İşçilərinin Həmrəyliyi Alyansının (TİHA) sədri, təhsil eksperti Əmrah Həsənli bildirib.
Onun sözlərinə görə, əsas məsələ bu addımın hansı institusional məqsədlərə xidmət etməsidir:
"Əvvəla, ödəniş mexanizmi müsabiqədə formal və məsuliyyətsiz iştirakın qarşısını almağa xidmət edə bilər. Son illər müşahidə olunurdu ki, real niyyəti və hazırlığı olmayan şəxslər də kütləvi şəkildə müraciət edir, bu isə həm sistemin yükünü artırır, həm də qiymətləndirmə prosesində əlavə resurs itkisinə səbəb olur. Simvolik də olsa ödəniş mexanizmi namizədləri daha düşünülmüş qərar verməyə təşviq edir".
Ekspert vurğulayıb ki, ikinci mühüm məqam əldə olunan vəsaitin imtahan prosesinin keyfiyyətinin artırılmasına yönəldilməsidir:
"Bu, texniki təminatın gücləndirilməsi, qiymətləndirmə mexanizmlərinin təkmilləşdirilməsi, şəffaflığın və operativliyin artırılması baxımından əhəmiyyətlidir. Yəni məqsəd gəlir əldə etmək deyil, prosesin daha dayanıqlı və səmərəli idarə olunmasıdır.
Eyni zamanda qərarda sosial həssaslıq da nəzərə alınıb. İlk dəfə müsabiqədə iştirak edənlər, əlilliyi olan şəxslər, ünvanlı dövlət sosial yardımı alan ailələrin üzvləri, şəhid ailələri və müharibə veteranlarının ödənişdən azad edilməsi onu göstərir ki, bu mexanizm sosial ədalət prinsipləri ilə uzlaşdırılıb. Bu yanaşma dövlətin müəllim peşəsinə çıxışı məhdudlaşdırmaq yox, əksinə, daha ədalətli mühit yaratmaq niyyətini ortaya qoyur".
Əmrah Həsənlinin fikrincə, ümumilikdə bu qərar müəllimlərin işə qəbulu prosesinə intizam, məsuliyyət və institusional yanaşma gətirə bilər. Lakin nəticənin müsbət olması üçün ödənişin məbləği optimal seçilməli, proses tam şəffaf aparılmalı və ictimaiyyətə açıq şəkildə izah olunmalıdır:
"Əsas hədəf say yox, keyfiyyət olmalıdır. Müəllimlərin işə qəbulu (MİQ) sistemi müəllim peşəsinin nüfuzunu qoruyan və gücləndirən mexanizm kimi fəaliyyət göstərməlidir.
Bu baxımdan qərarın effektivliyi onun tətbiq formasından asılı olacaq və düzgün icra olunduğu təqdirdə təhsil sistemində daha sağlam seçim mühiti formalaşdıra bilər", - deyə o bildirib.
Qeyd edək ki, MİQ ilə əlaqədar keçirilən müsabiqədə iştirak ödənişli olacaq.
Bununla bağlı Prezident İlham Əliyev "Ümumi təhsil haqqında" qanuna dəyişiklikləri təsdiqləyib.
Dəyişikliklərə əsasən, ödəniş ilk dəfə müsabiqədə iştirak edənlər, əlilliyi olan şəxslər, ünvanlı dövlət sosial yardımı alan ailələrin üzvləri, şəhid ailəsinin üzvləri və Azərbaycanın ərazi bütövlüyü uğrunda döyüş əməliyyatlarında iştirak etdiyinə görə "Müharibə veteranı" adı alan şəxslərə münasibətdə nəzərdə tutulmayıb.
Türkan İsgəndərli
