Rusiyanın geri aldığı rus əsirləri yenidən Ukraynanın "qucağına" qaçır

Ukrayna rəsmiləri rəsmi əsir mübadiləsindən sonra yenidən cəbhəyə göndərilən və ikinci dəfə Ukrayna qüvvələrinə təslim olan rus hərbçiləri ilə bağlı maraqlı statistika açıqlayıblar.

TodayPress TV xəbər verir ki, "RBC-Ukraine"nin yaydığı məlumata görə, Kiyevdə fəaliyyət göstərən Hərbi Əsirlərlə İş üzrə Koordinasiya Qərargahı rəsmi əsir mübadiləsi çərçivəsində Rusiyaya qaytarılan bəzi hərbçilərin yenidən döyüş bölgəsinə göndərildikdən sonra ikinci dəfə Ukraynaya təslim olduqlarını bildirib.

Qərargahın məlumatına əsasən, hazırda Ukraynada saxlanılan rusiyalı hərbi əsirlər arasında ikinci dəfə əsir düşən təxminən 20 nəfər var.

Ukrayna rəsmilərinin iddiasına görə, bunun əsas səbəbi Rusiyada mübadilə edilən hərbçilərin istirahətə buraxılmadan yenidən cəbhəyə göndərilməsidir. Bildirilir ki, Ukrayna qanunvericiliyinə əsasən isə əsirlikdən geri qaytarılan hərbçilər məcburi şəkildə yenidən döyüşlərə cəlb edilmir.

Ukrayna tərəfi hesab edir ki, ikinci dəfə təslim olan hər bir rus hərbçisi gələcək əsir mübadilələri üçün əlavə imkan yaradır.

Rusiya tərəfi isə sözügedən iddialarla bağlı hələlik rəsmi açıqlama verməyib.

Jalə Rövşən