İndoneziyanın valyuta ehtiyatları sabit qaldı

İndoneziya Mərkəzi Bankı may ayının sonunda ölkənin xarici valyuta ehtiyatlarının 152,5 milyard ABŞ dolları səviyyəsində qaldığını açıqlayıb. Bu göstərici əvvəlki ayla – aprel ilə müqayisədə dəyişməyib.

TodayPress TV "Xinxua"ya istinadən xəbər verir ki, Bank İndoneziyanın Kommunikasiya Departamentinin icraçı direktoru Ramdan Deni Prakoso ehtiyatların sabit qalmasının vergi gəlirləri, xidmət sektorundakı daxilolmalar və neft-qaz ixracından əldə edilən valyuta ilə bağlı olduğunu bildirib.

O qeyd edib ki, bu sabitlik xarici borc ödənişləri və valyuta məzənnəsinin sabitləşdirilməsi tədbirləri fonunda əldə olunub, baxmayaraq ki, qlobal maliyyə bazarlarında qeyri-müəyyənlik davam edir.

Mərkəzi Bankın məlumatına görə, bu ehtiyat həcmi 6,4 aylıq idxalın və ya 6,2 aylıq idxal və dövlət borcu ödənişlərinin maliyyələşdirilməsi üçün kifayətdir. Bu göstərici beynəlxalq adekvatlıq standartından xeyli yüksəkdir.

Bank İndoneziya hesab edir ki, mövcud ehtiyat səviyyəsi ölkənin xarici dayanıqlığını və iqtisadi sabitliyini qorumağa yetərlidir. Qurum, ixrac, kapital axınları və investor etimadına əsaslanaraq valyuta ehtiyatlarının güclü qalacağına ümid edir.

Qiymət Mahir