Cənubi Koreyada məktəblərdə mobil telefon istifadəsi qadağan edildi

Cənubi Koreya Milli Assambleyası məktəblərdə dərs saatlarında mobil telefon və ağıllı cihazların istifadəsini qadağan edən qanun layihəsini qəbul edib.

TodayPress TV xəbər verir ki, bu barədə "The Korea Herald" qəzeti məlumat yayıb. 

Qanun layihəsi Milli Assambleyada keçirilən səsvermədə iştirak edən 163 deputatdan 115-nin səsi ilə təsdiqlənib.

Yeni qanuna əsasən, şagirdlər dərs saatlarında mobil telefon və digər ağıllı cihazlardan istifadə edə bilməyəcəklər. Yalnız fiziki məhdudiyyətləri olan və xüsusi təhsilə ehtiyacı olan şagirdlər, eləcə də təcili vəziyyətlərdə istisnalar nəzərdə tutulur.

Qanun 2026-cı ilin mart ayından, yəni yeni tədris ilindən etibarən qüvvəyə minəcək.

Cənubi Koreya Təhsil Nazirliyinin məlumatına görə, ölkə əhalisinin təxminən dörddə biri mobil telefonlara həddindən artıq bağlıdır. Bu göstərici 10-19 yaş arası yeniyetmələr arasında 43 faizədək yüksəlir. Araşdırmalar göstərir ki, gənclərin üçdə birindən çoxu sosial şəbəkələrdə keçirdikləri vaxtı nəzarətdə saxlaya bilmirlər.

Qeyd edək ki, Cənubi Koreya bu qərarla yanaşı, artıq Fransa, Finlandiya, İtaliya, Niderland və Çin kimi ölkələrdə də şagirdlərin telefon istifadəsinə müxtəlif səviyyələrdə məhdudiyyətlər tətbiq edilib.

Aysel Mətləb