Qurban bayramında qurbanlıq seçimi: Hansı heyvanları kəsmək olmaz?

Qurban Bayramı müsəlmanların həyatında xüsusi bir yer tutur. Bu bayram sadəcə ənənə və ya bayram süfrəsi deyil, həm də İbrahim əleyhissalamın Allaha olan təslimiyyətinin, sınağın və qurbanın mənasını xatırladan müqəddəs bir ibadətdir.

Qurban kəsmək istəyən hər kəs üçün ən vacib məsələ isə qurbanlığın düzgün seçilməsidir. Bəs qurbanlıq heyvan hansı şərtlərə cavab verməlidir?

İslam alimlərinin ümumi qəbul etdiyi qaydalara görə, qurbanlıq heyvan sağlam olmalıdır. Xəstə, arıq, zəif heyvan qurban kəsilməz. Qurbanlıq üçün ən çox xırda buynuzlu heyvanlar seçilir. Qoyun və keçilər üçün ən azı 6-7 ayını tamamlamış olmalıdır. Çox kiçik, südəmər quzuları kəsmək düzgün deyil. 

Qurbanlıq alarkən baytarlıq arayışına (şəhadətnaməsinə) diqqət etmək lazımdır. Bayram öncəsi dövlət tərəfindən müəyyən edilmiş satış və kəsim məntəqələrindən almaq daha təhlükəsizdir. Orada heyvanlar əvvəlcədən yoxlanılır. Küçədə, yol kənarında satılan, mənşəyi bəlli olmayan heyvanları almaq risklidir. 

Qeyd edək ki, bu il Azərbaycanda Qurban bayramı 2026-cı ildə mayın 27-si və 28-nə təsadüf edir.

Türkan İsgəndərli