"Ölüm saatı" çatdı? - Britaniyanın İrandakı səfirliyini bağlamasının sirri
İngiltərə Tehrandakı səfirliyini təcili bağlamaq qərarı verib. Bildirilir ki, bəzi Avropa ölkələri də oxşar qərar verməyə hazırlaşırlar.
Maraqlıdır, ingilislər Tehrandakı səfirliyini niyə məhz indi bağlamaq qərarı verdi?
Bu addımın arxasında hansı siyasi və ya hərbi səbəblər dayana bilər?
Sözügedən məsələ ilə bağlı politoloq Elçin Xalidbəyli TodayPress TV-yə danışıb.
O, qeyd edib ki, Böyük Britaniyanın Tehrandakı səfirliyini bağlaması qətiyyən təsadüfi deyil:
"Son baş verən hadisələr belə bir addımın məqsədyönlü və olduqca ciddi məlumatlar əsasında atıldığını göstərir.
Birincisi, son vaxtlar Amerika Birləşmiş Ştatlarının İrana qarşı hərbi zərbələri intensivləşməyə başlayıb. Digər tərəfdən, Böyük Britaniyada baş nazir dəyişikliyindən sonra rəsmi London və Ağ Ev arasında yeni siyasi dialoq mərhələsi başlayıb. Əvvəlki baş nazir Amerika Birləşmiş Ştatlarının İrana qarşı başladığı hərbi əməliyyatlara qoşulmağa o qədər də həvəs göstərmir, müəyyən məsafə saxlamağa çalışırdı. Ancaq yeni baş nazir Böyük Britaniyanın Amerika Birləşmiş Ştatlarının yanında olduğunu daha qabarıq şəkildə nümayiş etdirməyə çalışır".
Analitik xatırladıb ki, Böyük Britaniyanın yeni baş naziri vəzifəsinin icrasına başladıqdan dərhal sonra Amerika Birləşmiş Ştatlarının Prezidenti Donald Trampla telefon danışığı aparıb:
"Nə qədər qəribə də olsa, Böyük Britaniyanın Tehrandakı səfirliyini bağlaması məhz Prezident Donald Trampla telefon danışığından sonrakı dövrə təsadüf edir. Belə ehtimal etmək olar ki, Böyük Britaniyanın yeni baş naziri Donald Trampla telefon danışığı zamanı Amerika Birləşmiş Ştatlarının İrana qarşı daha genişmiqyaslı hərbi zərbələr endirəcəyi barədə müəyyən məlumatlar əldə edib. Məhz buna görə də Böyük Britaniya səfirliyinin və onun əməkdaşlarının zərər görməsinin qarşısını almaq məqsədilə səfirliyi bağlamaq qərarına gəlib. Üstəlik, Prezident Donald Tramp son açıqlamalarında da vurğulayıb ki, İrana qarşı daha genişmiqyaslı hərbi əməliyyatlara başlanılması ilə bağlı qərarın verilməsinə çox yaxındır".
Politoloq əlavə edib ki, Böyük Britaniya Amerika Birləşmiş Ştatlarının ənənəvi olaraq ən yaxın müttəfiqlərindən biri kimi, böyük ehtimalla Ağ Evdən bu barədə müəyyən məlumatlar almış ola bilər. Buna görə də İrandakı britaniyalı diplomatların zərər görməsinin qarşısını əvvəlcədən almağa çalışırlar.
"Rəsmi London bu istiqamətdə belə addımlar atırsa, bu, İranla bağlı hərbi əməliyyatların daha da genişlənməsi və intensivləşməsi ehtimalının kifayət qədər yüksək olduğunu göstərir", — ekspert vurğulayıb.
Elçin Xalidbəyli Böyük Britaniyadan əvvəl oxşar addımı digər Avropa ölkələrinin də atdığını xatırladıb:
"Fransa da Tehrandakı səfirliyinin əməkdaşlarını İrandan çıxarmışdı. Bu da onu göstərir ki, Avropa ölkələri, o cümlədən Fransa və Böyük Britaniya bu risklə bağlı əvvəlcədən məlumatlandırılıblar. Bu isə yaxın vaxtlarda İran ərazisində, o cümlədən paytaxt Tehran da daxil olmaqla, Amerika Birləşmiş Ştatlarının hərbi zərbələrinin daha genişmiqyaslı və intensiv xarakter ala biləcəyi ehtimalını gücləndirir".
Jalə Rövşən
PHOTOS
