Yayda su içmək əvəzinə bu meyvələrdən yeyin
Havalar sərin keçsə də, isti yay günləri hələ qarşıdadır.
TodayPress TV xəbər verir ki, astronomik yay fəslinin Azərbaycana iyunun 21-i, Bakı vaxtı ilə saat 12:24:26-da daxil olması gözlənilir.
Müəyyən səbəblərdən ötrü insan çölə çıxmaq məcburiyyətində olur. Bu havalarda isə əsas problem susuzluqdur. Susuzluğun qarşısını almaq üçün bəzi meyvə və giləmeyvələr digərlərinə nisbətən daha faydalı ola bilər. Meyvələrin susuzluğu yatırma xüsusiyyəti təkcə tərkibindəki su miqdarından deyil, həm də mineralların və şəkərlərin balansından asılıdır.
Yay mövsümünün sevimli qidası qarpız bu baxımdan ən faydalı meyvələrdən biridir. Tərkibinin təxminən 92 faizi sudur və kaliumla zəngindir. Qreyfrut, yaşıl alma, qarağat və albalı kimi meyvələr də istilik zamanı orqanizm üçün daha uyğun hesab edilir. Onların turş dadı tüpürcək ifrazını artıraraq ağız quruluğunu azaldır, həmçinin nisbətən aşağı fruktoza tərkibi qan şəkərində kəskin artım yaratmır.
Bunun əksinə olaraq, üzüm, yetişmiş banan, əncir, şirin albalı və quru meyvələr daha çox şəkər ehtiva etdiyinə görə susuzluğu artıra bilər. Mütəxəssislərin fikrincə, bu meyvələrin həzmi zamanı orqanizm əlavə suya ehtiyac duyur. Eyni zamanda meyvə şirələrinin də ehtiyatla qəbul edilməsi tövsiyə olunur, çünki lifsiz və yüksək konsentrasiyalı şəkər tərkibli olduqları üçün susuzluğu və şişkinliyi artıra bilirlər.
Türkan İsgəndərli
