Dəyişkən havalarda sağlamlığımızı necə qoruyaq? – Həkim XƏBƏRDARLIQ ETDİ

Son günlərdə Azərbaycanda havanın qeyri-sabit keçməsi nəticəsində əhali arasında, xüsusilə də uşaqlarda xəstəlik hallarının artması müşahidə olunur. Ən çox rast gəlinən simptomlar arasında öskürək, yüksək hərarət, boğaz və qulaq ağrıları yer alır.

Mövzu ilə bağlı TodayPress TV-yə danışan həkim-pediatr Aytən İsmayılzadə bildirib ki, virusların uşaqların orqanizmində uzun müddət qalmasının əsas səbəblərindən biri düzgün qidalanmama və süni vasitələrdən həddindən artıq istifadədir:

“Hazırda mövsümi xəstəliklər əsasən virus mənşəli olan qrip, paraqrip, respirator sinsitial virus (RSV) və digərləridir. Bu viruslar insanlarda yüksək hərarət, öskürək, burun axması (zökəm), baş ağrısı və ümumi halsızlıq kimi əlamətlərlə özünü göstərir. Öskürəyin uzun müddət davam etməsinin əsas səbəblərindən biri, xüsusilə uşaqlar arasında allergik fonun geniş yayılmasıdır. Uşaqların təxminən 90 faizi müxtəlif allergik həssaslığa malikdir. Bu isə birbaşa qidalanma ilə bağlıdır. Uşaqların çoxu süni və emal olunmuş qidalarla böyüyür. Bu cür qidaların tərkibində isə tez-tez kimyəvi qatqılar və allergik maddələrə rast gəlinir".

Həkimin sözlərinə görə, süni və yüksək dərəcədə emal olunmuş qidalar, o cümlədən “fast food” məhsulları, orqanizmdə toksinlərin yığılmasına səbəb olur. Bu isə immun sistemini zəiflədir və virus infeksiyalarından sağalma müddətini uzadır:

“Qeyri-sağlam qidalar bağırsaq mikroflorasına da mənfi təsir göstərir. Bu isə orqanizmin immun müdafiəsini zəiflədir və hər hansı virus və ya infeksiyadan sonra sağalma prosesini çətinləşdirir, ağırlaşma riskini artırır. Belə hallarda antibiotiklərin təyinatı çox zaman qaçılmaz olur. Məhz bu səbəbdən müalicə zamanı bioloji və inteqrativ tibb üsullarına üstünlük verilməlidir", - deyə pediatr vurğulayıb.

Türkan İsgəndərli