Zikhlərə qarşı zorakılıq mövzusunda beynəlxalq konfrans keçirildi
16 yanvar 2026-cı il tarixində Bakıda Bakı Təşəbbüs Qrupunun (BTQ) təşkilatçılığı ilə Azərbaycanda ilk dəfə olaraq “Hindistanda zikhlərə və digər milli azlıqlara qarşı irqçilik və zorakılıq: mövcud reallıqlar” mövzusunda beynəlxalq konfrans keçirilib.
TodayPress TV xəbər verir ki, konfrans geniş beynəlxalq iştirak və əhəmiyyətli ictimai-siyasi rezonans doğurub.
Tədbir həmçinin beynəlxalq media məkanında geniş şəkildə işıqlandırılmış və bir sıra nüfuzlu beynəlxalq və regional media qurumları tədbirlə bağlı analitik və informativ materiallar dərc etmişdir. Xüsusilə Hindistanın SikhPoliticsNews, KhireyaPunjab, MediaPunjab, BolePunjab və QuamieKta media platformaları, o cümlədən Pakistanın The Gulf Observer və HumEnglish portalları, Türkiyənin TRT1 televiziya kanalı, eləcə də Gürcüstanda mənzillənən OC Media informasiya portalı konfrans barədə ətraflı məlumat yaymışdır. Sözügedən media qurumları konfrans çərçivəsində səsləndirilən mövqeləri, tarixi faktları və mövcud insan hüquqları vəziyyətini geniş auditoriyaya çatdıraraq tədbirin beynəlxalq əhəmiyyətini ön plana çıxarıb.
Konfrans, eyni zamanda, sosial şəbəkələrdə, xüsusilə Hindistanın etnik və dini azlıqlara qarşı zorakı siyasətindən zərər çəkmiş və hazırda Kanada, Böyük Britaniya, ABŞ, Avstraliya və digər ölkələrdə yaşayan Zikh diaspor icmaları arasında X (Twitter), Facebook və digər platformalarada geniş müzakirə edilmişdir. Xaricdə fəaliyyət göstərən bir sıra zikh təşkilatlar Bakı Təşəbbüs Qrupu-nun paylaşdığı postları yenidən paylaşıb.
Sosial media müzakirələrində əsasən “Bakı Təşəbbüs Qrupu zikhlərə qarşı diskriminasiyanı beynəlxalq gündəmə çıxardı”, “Bakıda zikhlərə qarşı zorakılığa həsr olunmuş beynəlxalq konfrans keçirildi”, “Hindistanda azlıqlara qarşı repressiyalar Bakıda beynəlxalq müstəvidə müzakirə olundu” və “Sikhlərin hüquqlarının müdafiəsi üçün yeni qlobal platforma: Bakı Konfransı” və s. bu kimi başlıqlar diqqət çəkib.
Bu başlıqlar altında yüzlərlə paylaşım, repost və şərh edilmiş, konfransın materialları və çıxışları geniş auditoriyaya çatdırılmışdır. Tədbir #BakuInitiativeGroup, #SikhRights, #JusticeFor1984 və #HumanRightsInIndia kimi həştəqlərlə sosial mediada trendə çevrilib.
Konfrans Hindistanda etnik və dini azlıqlara qarşı repressiv siyasətin beynəlxalq gündəmə çıxarılması baxımından mühüm addım kimi qiymətləndirilir. Həmçinin, BTQ-nin dekolonizasiya, əsarət altında yaşayan xalqların hüquqlarının müdafiəsi sahəsində qlobal müstəvidə artan rolunu bir daha nümayiş etdirir, zikhlərin hüquqlarının müdafiəsi istiqamətində yeni beynəlxalq platformanın yaradılmasında irəliyə doğru ciddi addımdır. Konfrans çərçivəsində səsləndirilən faktlar və məlumatların yaxın aylarda BMT və digər beynəlxalq institutların gündəminə çıxarılması planlaşdırılır.
