Prokurorluq işçilərinin qulluqda olma yaş həddinin artırılması son oxunuşda qəbul edildi

Milli Məclis prokurorluq işçilərinin qulluqda olmasının yaş həddinin 60 yaşdan 65 yaşa qaldırılmasını son oxunuşda qəbul edib.

TodayPress TV xəbər verir ki, bununla bağlı “Prokurorluq orqanlarında qulluq keçmə haqqında” qanuna təklif edilən dəyişiklik parlamentin növbədənkənar sessiyasının bugünkü plenar iclasında müzakirə olunub.

Qeyd olunub ki, bu yaş həddinin son yaş həddi olması təklif edilir.

Bildirilib ki, dəyişikliyin əsas məqsədi uzunmüddətli təcrübəyə malik prokurorluq işçilərinin prokurorluq orqanlarında fəaliyyətini davam etdirməsinə şərait yaradaraq prokurorluq orqanlarının səmərəliyinin artırılmasıdır. Qeyd olunanlara əsasən, "Prokurorluqda qulluq keçməyə xitam verilmə əsasları" adlı 29-cu maddəyə prokurorluqda qulluq keçməyə xitam verilməsi hallarına prokurorluqda son yaş həddinə çatmaq halının da əlavə edilməsi təklif edilir.

Sənəddə vurğulanıb ki, Azərbaycan Prezidentinin 2001-ci il 19 iyun tarixli 509 nömrəli Fərmanı ilə təsdiq edilmiş "Prokurorluğa işə qəbul olunmaq üçün namizədlərlə müsabiqə keçirilməsi qaydaları haqqında Əsasnamə"nin 1.5-ci bəndinə əsasən, məhkəmə və hüquq mühafizə orqanlarından, habelə hüquq mühafizə orqanlarının fəaliyyətinin əlaqələndirilməsi, qanunvericilik və ya təşkilati təminatı ile bağlı vəzifələrdən prokurorluğa işə keçirilən şəxslər ixtisas imtahanlarından azad oluna bilərlər və bu halda onlarla müsahibə aparılır.

Qeyd olunanlara əsasən, Qanunun 18.7-ci maddəsinə dəyişiklik edilərək, prokurorluğa keçirilmə qaydasında işə qəbul edilmiş işçilərə rütbələrin onlar müsahibədən keçdikdən sonra verilməsi təklif edilir.

Sənəd layihəsi müzakirələrdən sonra səsə qoyularaq üçüncü oxunuşda qəbul edilib.