Türkiyə XİN: İsrail Qəzzadakı cinayətlərin diqqətdən yayınmasına çalışır
Türkiyə Xarici İşlər Nazirliyi İsrail hökumətinin 1915-ci il hadisələri ilə bağlı qərarını tənqid edib.
TodayPress TV xəbər verir ki, nazirliyin bəyanatında bu qərarın İsrailin Fələstin xalqına qarşı törətdiyi cinayətləri ört-basdır etməyə yönəlmiş siyasi addım olduğu bildirilib.
Ankara bəyan edib ki, bu təşəbbüs tarixi və hüquqi faktları görməzdən gəlir, həmçinin Benjamin Netanyahu və barəsində "International Criminal Court" tərəfindən fələstinlilərə qarşı cinayətlər ittihamı ilə həbs orderi verilmiş digər İsrail rəsmilərinin düşdüyü çıxılmaz vəziyyəti nümayiş etdirir.
Türkiyə, həmçinin İsrailin bölgədəki ekspansionist və sabitliyi pozan siyasətinin dayandırılması, eləcə də Netanyahu hökumətinin, ilk növbədə fələstinli mülki şəxslərə qarşı törədilən cinayətlərə görə məsuliyyətə cəlb olunması istiqamətində fəaliyyətini davam etdirəcəyini vurğulayıb.
