Sudanın baş naziri sülh təşəbbüsünü təqdim etdi
Sudanın keçid dövrünün Baş naziri Kamil İdris bazar ertəsi günü BMT Təhlükəsizlik Şurasına Sudan Silahlı Qüvvələri ilə Çevik Dəstək Qüvvələri arasında müharibəyə son qoymağı hədəfləyən sülh təşəbbüsünü təqdim etdi.
TodayPress TV xəbər verir ki, bu barədə "Xinhua" məlumat yayıb.
O, Təhlükəsizlik Şurasına bildirib ki, atəşkəs, Çevik Dəstək Qüvvələrinin nəzarəti və tərksilahı, eləcə də humanitar məsələləri əhatə edən təşəbbüs mülki şəxsləri qorumaq, vəhşiliklərə son qoymaq, dövlət hakimiyyətini bərpa etmək və milli barışığa yol açmaq üçün real, tətbiq oluna bilən və inklüziv bir çərçivə təklif edib.
"Biz Birləşmiş Millətlər Təşkilatı, Afrika İttifaqı və Ərəb Dövlətləri Liqasının birgə monitorinqi altında hərtərəfli atəşkəs elan etməliyik. Eyni zamanda üsyançı milislərin işğal etdiyi bütün ərazilərdən çıxarılması lazımdır", - deyə Kamil İdris bildirib.
"Müxalifət döyüşçülərinin geri çəkilməsi və birgə nəzarət altında razılaşdırılmış düşərgələrdə qruplaşdırılmasına ehtiyac var. Bu nəzarət BMT, Afrika və Ərəb Dövlətləri tərəfindən həyata keçiriləcək", - deyə o əlavə edib.
Baş nazirin sözlərinə görə, məcburi köçkünlərin öz doğma bölgələrinə təhlükəsiz qayıtması və münaqişədən təsirlənən ərazilərə humanitar yardımın maneəsiz axınının təmin edilməsi də vacibdir.
Qeyd edək ki, Sudanda 15 aprel 2023-cü ildən bəri Sudan Silahlı Qüvvələri ilə Çevik Dəstək Qüvvələri arasında münaqişə gedir.
Aysel Mətləb
