NATO tamamilə dəyişir - Yeni strategiya təqdim olundu

Ankarada NATO-nun 36-cı Liderlər Zirvəsi öz işinə başlayıb. Sammitin açılışı ərəfəsində NATO-nun Baş katibi Mark Rutte mətbuat konfransı keçirərək Alyansın qarşıdakı dövr üçün əsas hədəflərini açıqlayıb.

TodayPress TV xəbər verir ki, Rütte ötən il Haaqada qəbul olunan qərarların icrasına artıq başlanıldığını bildirib. Onun sözlərinə görə, müttəfiq ölkələr 2035-ci ilə qədər ÜDM-in 5 faizini müdafiəyə ayırmaq öhdəliyini yerinə yetirmək üçün konkret planlarla sammitə gəliblər. Baş katib qeyd edib ki, Avropa ölkələri və Kanada müdafiə xərclərini əhəmiyyətli dərəcədə artırıb və bu proses davam edir.

O deyib ki, NATO-nun əsas məqsədi təkcə daha çox vəsait ayırmaq deyil, həmin vəsaiti real hərbi gücə çevirməkdir. Bunun üçün müdafiə sənayesinin istehsal imkanları genişləndirilməli, pilotsuz uçuş aparatları, raketlər və hava hücumundan müdafiə sistemlərinin istehsalı artırılmalıdır. Sabah keçiriləcək NATO Müdafiə Sənayesi Forumunda bu istiqamətdə on milyardlarla dollar dəyərində yeni müqavilələrin açıqlanacağı gözlənilir.

“NATO 3.0” strategiyası

Rütte Ankarada “NATO 3.0” adlandırdığı yeni yanaşmanı təqdim edib. Bu strategiya Avropa ölkələrinin Alyans daxilində daha çox məsuliyyət götürməsini, müdafiə sənayesində əməkdaşlığın gücləndirilməsini, yeni texnologiyalara investisiyanın artırılmasını və hərbi istehsalın genişləndirilməsini nəzərdə tutur.

Baş katib bildirib ki, məqsəd müdafiə sahəsində qərarların daha sürətli icrası, istehsalın artırılması və NATO ölkələrinin müdafiə sənayesini vahid şəkildə işləyən sistemə çevirməkdir. Onun sözlərinə görə, güclü Avropa təhlükəsizliyi daha güclü NATO deməkdir.

Rütte çıxışında Ukraynaya dəstək məsələsinə də toxunub. O bildirib ki, Rusiya Ukrayna şəhərlərinə raket və pilotsuz uçuş aparatları ilə hücumlarını davam etdirir. Baş katib müttəfiqləri, xüsusilə hava hücumundan müdafiə sistemləri ilə bağlı Kiyevə dəstəyi davam etdirməyə çağırıb. Onun sözlərinə görə, Ukraynanın təhlükəsizliyi NATO ölkələrinin təhlükəsizliyi ilə birbaşa bağlıdır.

Kübra Musayeva