Türkiyə alyansın “Cənub qalxanı” olmaq istəyir

NATO-nun Ankarada keçirilən sammitində Türkiyənin əsas diqqət yetirəcəyi məsələlərdən biri alyansın Cənub cinahının gücləndirilməsidir.

TodayPress TV xəbər verir ki, Ankara NATO-nun təhlükəsizlik gündəliyində yalnız Rusiya və Şərqi Avropa istiqamətinin deyil, Yaxın Şərq və Aralıq dənizi bölgəsinin də daha çox yer almasını istəyir.

Türkiyə hesab edir ki, İraq, Suriya və Liviya kimi ölkələrdəki qeyri-sabitlik, terror təhlükəsi və regional gərginlik NATO üçün ciddi çağırışlardır. Buna görə də Ankara sammitdə alyansın cənub istiqamətində fəaliyyətinin genişləndirilməsini və bu bölgələr üzrə daha koordinasiyalı siyasət yürüdülməsini gündəmə gətirəcək.

Türkiyə xüsusilə Körfəz ölkələri ilə təhlükəsizlik əməkdaşlığının artırılmasını istəyir. Ankara NATO ilə Körfəz tərəfdaşları arasında müdafiə sahəsində əlaqələrin genişləndirilməsini, birgə layihələrin və təhlükəsizlik mexanizmlərinin gücləndirilməsini vacib hesab edir.

Həmçinin Türkiyə özünü NATO daxilində yalnız ev sahibi ölkə kimi deyil, alyansın cənub sərhədlərində sabitliyin qorunmasında əsas rol oynayan dövlət kimi təqdim etməyə çalışır.

Ankara hesab edir ki, Yaxın Şərqdə baş verən proseslər birbaşa NATO-nun təhlükəsizliyinə təsir edir və buna görə də alyansın strategiyası həm şərq, həm də cənub istiqamətini əhatə etməlidir.

Kübra Musayeva