Dünyada yeni virus təhlükəsi
Hindistan səhiyyə orqanları epidemiya potensialına malik, peyvəndi və ya müalicəsi olmayan Nipah virusunun yayılması ilə mübarizə aparırlar.
TodayPress TV xəbər verir ki, bu barədə "The Metro" nəşri məlumat yayıb.
Bildirilir ki, ölkədə beş yoluxma halının aşkarlanıb. Bu həftə ərzində bir həkim, bir tibb bacısı və bir səhiyyə işçisi virusa yoluxub.
Hazırda komada olan tibb bacısının ağır tənəffüs xəstəliyi olan bir xəstəni müalicə edərkən infeksiyaya yoluxduğu ehtimal olunur.
Hökumət orqanları yoluxmuş şəxslərlə təmasda olan 180 nəfəri testdən keçirib və onlardan 20 nəfəri karantinə alıb.
Qeyd edək ki, Nipah virusu heyvanlar və insanlar arasında yayılır, eyni zamanda, insandan insana da ötürülə bilər. Hindistanda bir çox insan yarasalar vasitəsilə yoluxur. İnsanlarda virus asimptomatik infeksiya və ya kəskin tənəffüs xəstəliyi kimi özünü göstərə bilər. Simptomlara qızdırma, başağrısı, əzələ ağrıları, qusma və boğaz ağrısı daxildir və ağır hallarda beyin iltihabı iki gün ərzində komaya səbəb ola bilər.
Türkan İsgəndərli
