Avropadan danışırıqsa, niyə onun ölçülərindən uzaqlaşırıq?

Yay mövsümünün qızğın çağında Azərbaycanda hotellərin və istirahət xidmətlərinin qiymətləri yenidən ictimai müzakirələrin mərkəzinə çevrilib. Bəzi xarici ölkələrdə bir həftəlik hotel qiymətinin Azərbaycanda bir günlük istirahət xərcinə bərabər olması ilə bağlı müqayisələr aparılır.

Bəs bu bahalığın əsas səbəbi nədir?

Mövzu ilə bağlı TodayPress TV-yə danışan turizm eksperti Ceyhun Aşurov bildirib ki, Azərbaycanda turizm xidmətlərinin bahalığını yalnız hotellərin və restoranların qiymətləri ilə əlaqələndirmək düzgün deyil.

Onun sözlərinə görə, əsas problem nəqliyyat xərclərinin yüksək olmasıdır:

"Xüsusilə mövsümün pik dövründə qiymətlərin yüksəldiyini müşahidə edirik. Lakin ölkəmizdə eyni kateqoriyalı hotelləri və digər yerləşmə obyektlərini müqayisə etdikdə görürük ki, qiymətlərin yüksək olması təkcə hotel və restoran xidmətlərindən qaynaqlanmır. Turizm xidmətlərinin ümumi bahalı görünməsinin əsas səbəblərindən biri nəqliyyat xərclərinin yüksək olmasıdır. Bu problem daha çox xarici turistlərin Azərbaycana səfəri zamanı özünü göstərir. Hazırda xarici turistlərin ölkəmizə gəlməsi kifayət qədər baha başa gəlir. Bunun səbəbi yalnız quru sərhədlərinin bağlı qalması deyil. Eyni zamanda, hava nəqliyyatı ilə Azərbaycana uçuşların qiyməti də digər turizm istiqamətləri ilə müqayisədə yüksəkdir. Təbii ki, bu da ölkəmizə gələn turistlərin sayına mənfi təsir göstərən amillərdən biridir".

Ekspert əlavə edib ki, daxili turizmdə qiymət artımına təsir edən əsas amillərdən biri regionlarda yüksək kateqoriyalı hotellərə olan tələbatın çox olmasıdır:

"Ölkə daxilində hərəkətliliyə baxdıqda görürük ki, xüsusilə regionlarda fəaliyyət göstərən beşulduzlu hotellərə tələbat daha yüksəkdir. Tələb artdıqca, xüsusilə yay mövsümündə qiymətlər də yüksəlir. Arzuolunan odur ki, regionlarda təklif daha da artsın. Xüsusilə üç və dördulduzlu hotellərin sayı çoxalsa, bazarda rəqabət güclənər və nəticədə xidmətlərin qiymətləri daha əlçatan səviyyədə formalaşar. Son dövrlərdə kənd evlərinin, A-frame tipli evlərin, villaların və digər yerləşmə məkanlarının sayı əhəmiyyətli dərəcədə artıb. Bəzən bir ailə və ya dost qrupu üçün belə məkanlarda qalmaq hotellərlə müqayisədə daha sərfəli olur. Bu da turistlərə daha geniş seçim imkanı yaradır".

Onun fikrincə, Azərbaycanda hotel qiymətlərini qiymətləndirərkən düzgün müqayisələrin aparılması vacibdir.

"Düşünmürəm ki, Azərbaycanda hotellərin və restoranların qiymətləri ümumilikdə yüksəkdir. Burada söhbətin hansı hotellərdən getdiyi və onların hansı ölkələrlə müqayisə olunduğu mühüm əhəmiyyət daşıyır. Eyni kateqoriyalı hotelləri müqayisə etsək, onların qiymətlərini bahalı hesab etməzdim. Ölkədə hotel fondunun həcmi də qiymətlərin formalaşmasına təsir edən amillərdən biridir. Hazırda Azərbaycanda, səhv etmirəmsə, 885 hotel fəaliyyət göstərir. Ölkənin turizm potensialını nəzərə aldıqda bu rəqəm o qədər də böyük deyil. Bununla yanaşı, müxtəlif yerləşmə məkanlarının sayı ildən-ilə artır və bu, müsbət haldır. Arzu edərdik ki, bu istiqamətdə inkişaf davam etsin. Təklif artdıqca rəqabət güclənəcək, qiymətlər daha balanslı olacaq və turistlər üçün seçim imkanları genişlənəcək".

Ceyhun Aşurov sonda vurğulayıb ki, Azərbaycanın turizm sektorunun inkişafı üçün əsas diqqət nəqliyyat əlçatanlığının artırılmasına yönəldilməlidir:

"Ölkə xaricindən Azərbaycana gəlmək üçün nəqliyyat xərcləri ümumi səyahət büdcəsində ən böyük paya malikdir. Məhz bu amil hazırda ölkədə turizmin daha sürətli inkişafına müəyyən qədər mane olur. Bu istiqamətdə həll yolları tapılarsa, həm gəlmə turizminin, həm də bütövlükdə turizm sektorunun inkişafı üçün daha əlverişli şərait yaranar".

Türkan İsgəndərli