Suriyanın sivil dünyaya inteqrasiyası: ABŞ və Aİ prosesdə

“Suriya Ərəb Respublikasının keçid dövrü Prezidenti Əhməd Əl Şaraa iqtidarı qısa zamanda Suriyaya qarşı fikirləri müəyyən qədər dəyişməyi bacardı”.

Siyasi ekspert Həşim Səhrablı bunu TodayPress TV-yə danışarkən deyib.

O, Suriyaya qarşı sanksiyaların aradan qaldırılmasına münasibət bildirib:

“ABŞ, daha sonra Avropa İttifaqı (Aİ) Suriyaya qarşı sanksiyaları aradan qaldırdı. Hətta Yaponiya da Suriyanın 4 bankına qarşı tətbiq etdiyi sanksiyanı aradan qaldırdığını bildirdi. Ümumiyyətlə, Suriyaya qarşı əvvəllər tətbiq edilən beynəlxalq sanskiyaların yavaş-yavaş aradan qaldırılması hakimiyyət dəyişikliyindən – Bəşər Əsəd rejminin devrilməsindən sonra sivil dünyaya inteqrasiya istiqamətində atılan ciddi addımların nəticələri kimi dəyərləndirilə bilər. Əhməd Əl Şaraa iqtidarı qurulanda dünya onu terror təfəkküllü biri və ya silahlı qruplaşma lideri kimi qəbul edir və o şəkildə tanıtmağa cəhd edirdilər. Türkiyənin diplomatik dəstəyi, öz dövlətçilik təcrübələrini yeni iqtidarla bölüşməsi, buradan yola çıxaraq addımların atılması sayəsində Əhməd Əl Şaraa iqtidarı qısa zamanda Suriya haqqında fikirləri müəyyən qədər dəyişməyi bacardı. Zaman keçdikcə bu addımların kəsərliliyinin artdığını və Suriyanın həqiqətən də müasir dünyanın tələblərinə uyğun demokratik dövlət quruculuğu istiqamətində ciddi addımlar atdığının şahidi oluruq”. 

Analitik bunu Suriyanın sivil dünyaya inteqrasiyası kimi qiymətləndirir:

“Bu, boş söz yığını deyil. Dünyanın 3 fərqli iqtisadi güc mərkəzi – ABŞ, Aİ, Yaponiyanın qısa zaman fərqi ilə Suriyaya qarşı sanskiyaları yumuşaltması və bu addımların davamlı xarakter alması onu deməyə əsas verir ki, Suriya sivil dünyaya inteqrasiya olunur. Bu, Suriya üçün daha yaxşı gələcək və inkişaf edən reallıq vəd edir. Yəqin ki, müsbət tendensiyaların və Əhməd Əl Şaraa iqtidarının atdığı addımların faydaları görüləcək və davam etdiriləcək. Bu halda dünya dövlətlərinin Suriyaya qarşı daha ciddi və sivil qərarlar verəcəyini gözləyə bilərik. Bu isə inkişafa açılan növbəti qapı olacaq”.

Qeyd edək ki, ABŞ-dən sonra Avropa İttifaqı (Aİ) Suriyadan bütün iqtisadi sanksiyaların aradan qaldırıldığını, həmçinin ölkənin 24 qurumunun, o cümlədən Mərkəzi Bankın qara siyahıdan çıxarıldığını elan edib. Eyni zamanda Yaponiya da Suriyaya qarşı sanksiyaları qismən ləğv etmək qərarına gəlib.

Qiymət Mahir