Rusiyanın Ermənistanla bağlı PLANI: Özünə yaxın siyasi fiquru hakimiyyətə gətirərək…

“Gümrüdəki Rusiya hərbi kontingentinin gücləndirilməsi ilə bağlı konkret əmr verildiyi barədə məlumatlar yayılıb. Bu informasiyanın nə dərəcədə həqiqətə uyğun olduğunu yalnız kəşfiyyat xidmətləri dəqiqləşdirə və təsdiqləyə bilər. Lakin belə bir məlumatın mediaya sızdırılması təsadüfi deyil, məqsədlidir”.

Politoloq Natiq Miri bunu TodayPress TV-yə danışarkən deyib.

Analitikin izahına görə, Rusiya doğrudan da Gümrüdə yerləşən hərbi bazaya əlavə canlı qüvvə göndərirsə, bu, ilk növbədə Kremlin Ermənistandakı geosiyasi maraqları ilə bağlıdır:

“Çünki son günlər Ermənistanda ictimai-siyasi sabitliyi pozmağa və hakimiyyət çevrilişinə yönəlmiş prosesin üstü açılıb. Bu proseslərin arxasında Rusiyanın dayandığı açıq şəkildə sezilir. Ermənistan rəhbərliyi də verdiyi bəyanatlarda dolayı yollarla məhz bu faktora işarə edir.

Hazırda Ermənistan sərhədlərində nə İran, nə Türkiyə, nə də Azərbaycan Rusiya üçün təhlükə təşkil edir. Əgər real xarici təhlükə yoxdursa, bəs Rusiya niyə Gümrüdəki hərbi kontingentini gücləndirməyə ehtiyac duyur? Bu sualın cavabı aydındır: məsələ Ermənistanın daxilində mümkün olan çevriliş ssenarisi və ya ona hazırlıqla bağlıdır. Rusiya vəziyyətin qarışacağı təqdirdə Ermənistanda özünə yaxın siyasi fiquru hakimiyyətə gətirmək üçün öncədən mövqe tutmağa çalışır.

Bu yanaşma, eyni zamanda, Rusiyanın Ermənistan vasitəsilə Azərbaycana təzyiq göstərmək planını da gündəmə gətirir. Belə ki, Kremlə bağlı qüvvənin Ermənistanda iqtidara gəlməsi istənilən anda Azərbaycana qarşı hərbi təxribat törətmək üçün bir mexanizmə çevrilə bilər. Bu isə növbəti Azərbaycan-Ermənistan qarşıdurmasının planlaşdırıldığını istisna etmir”.

Siyasətçi digər ehtimaldan da bəhs edib:

“Nəhayət, bu məlumatın mediada dövriyyəyə buraxılması bəlkə də həm Ermənistanı, həm də Azərbaycanı xəbərdar etmək məqsədi daşıyır. Yəni bu, “perspektivdə Rusiya belə bir addımı ata bilər” mesajıdır və Moskvanın bölgəyə yönəlik barmaq silkələməsidir. Əgər Ermənistan tərəfi bu məlumatı təkzib edirsə, deməli, hələlik praktik addımlar atılmayıb. Amma bu cür addımların atılıb-atılmayacağı yaxın gələcəkdə Ermənistandakı proseslərin inkişafı ilə birbaşa bağlı olacaq”.

Qeyd edək ki, Ukrayna ordusunun Baş Kəşfiyyat İdarəsi bu günlərdə iddia irəli sürüb ki, Rusiya Gümrüdəki bazasında hərbçilərinin sayını artırır, təyyarələrlə bazaya əlavə hərbçlilər göndərir və bu Azərbaycanla gərginləşən münasibətlərin fonunda baş verir. Ermənistan XİN bu iddiaları təkzib edib.  

Qiymət Mahir